काठमाडौँ । पोखरा महानगरमा नेकपा एमालेले बजेट पुस्तिका च्यातेपछि नगरसभा अवरुद्ध भएको छ । नगरसभाबाट बजेट पारित हुनुअगाडि बजेटको रातो किताबमा प्रकाशन गरिएको भन्दै एमालेबाट निर्वाचित जनप्रतिनिधिले विरोध जनाएसँगै नगरसभा अवरुद्ध भएको हो ।

एमाले जनप्रतिनिधिले विरोध जनाएसँगै बजेट प्रस्तुत प्रभावित भएको थियो । साढे ४ बजे शुरु भएको नगरसभामा एमालेबाट निर्वाचित प्रतिनिधि राधिका शाहीले रातो किताब च्यात्दै बजेट पारित हुनुअगाडि रातो किताब छापेको भन्दै आपत्ति जनाएकी हुन् । उनले १७६ जना नगरपालिका सदस्यको अधिकार हनन् गरी लोकतान्त्रिक विधि, विधान र नगरसभा सदस्यको अधिकारलाई कुल्चिदै बजेट प्रस्तुतभन्दा अगाडि रातो किताब छापेको भन्दै विरोध जनाएकी थिइन् ।

त्यस्तै, महानगरकी उपमेयर मञ्जुदेवी गुरुङले रातो किताब किन प्रकाशन गरियो भन्ने विषयमा आफू अनविज्ञ रहेको बताएन् । उनले रातो किताब किन भनियो र किन छापियो मेयरले त्यसको जवाफ दिनु पर्ने बताइन् ।

महानगरका मेयर धनराज आचार्यले किताब मस्यौदामात्र भएको र बजेटको अन्तिम रातो किताब नभएको भन्दै सभामा जवाफ दिएका थिए । उनले महानगरको नम्बर नघटोस् भनेर ‘लिजा’ (स्थानीय तह स्वमूल्यांकन प्रणाली)मा चढाउनका लागि लेखा शाखाले नियमित कामका क्रममा बजेट ड्राफ्ट तयार मात्रै गरेको बताए ।

एमालेको नाराबाजीपछि मेयर आचार्यले १० मिनेटका लागि नगरसभा स्थगित भएको घोषणा गरेका थिए । पोखरा महानगरले शुक्रबार नै करिब साढे ८ अर्बको बजेट प्रस्तुत गर्ने भएको छ । महानगरका मेयर र नेकपा एमालेका नगर सदस्यबीच छलफल भएसँगै बजेट पेस गर्न दिने सहमति जुटेको छ ।