काठमाडौँ । एनएमबि बैंकले सामाजिक दायित्वअन्तर्गत वीरेन्द्रनगर सुर्खेत १६ स्थित सरस्वती प्राथमिक विद्यालयको छानाको पुनर्सरचना र कक्षा कोठाको मर्मत सम्भार गरेको छ । गत जेठमा आएको हावाहुरीले उक्त विद्यालयको जस्ताको छाना उडाएपछि विद्यार्थी खुल्ला चौरमै पढ्न बाध्य थिए ।

एक कार्यक्रम माझ बैंकले ४ वटा कोठाको पुनः निर्माण गरी विद्यालयलाई हस्तान्तरण गरेको हो । उक्त कार्य परियोजनाको समापन तथा हस्तान्तरण कार्यक्रममा बैंकको तर्फबाट क्षेत्रीय प्रबन्धक मित्रराज प्याकुरेल, कर्मचारी निर्मल गौलीलगायत उपस्थित थिए । विद्यालयको तर्फबाट विद्यालय व्यवस्थापन समिती शिक्षक तथा विद्यार्थी र पत्रकारलगायत सदस्य उपस्थित थिए । उक्त कार्यक्रममा क्षेत्रीय प्रबन्धक प्याकुरेलले यस सहकार्यले विद्यार्थी भाइबहिनीमा पठन पाठनमा सहज हुने विश्वास व्यक्त गरे ।

बैंकले वित्तीय कारोबार मात्र गर्ने थाहा भए पनि सामाजिक कार्यमा सहयोग गर्ने कुराले आफू हर्षित भएको विद्यालयका प्रधानाध्यापक खड्कबहादुर खड्काले बताए । ‘सामाजिक कार्यमा एनएमबि बैंकको सहकार्यले शिक्षक, विद्यार्थी र अभिभावकमा खुसी छौं,’ प्रधानाध्यापक खड्काले भने, ‘वीरेन्द्रनगरकै विकट वडा भएकाले विद्यालयमा सेवा सुविधा छैन, यस्तो अवस्थामा बैंकले गरेको सहयोग अतुलनीय छ । ’

एनएमबि बैंकले हाल देशभरी २०१ शाखा, १३८ एटीएम, ११ एक्सटेन्सन काउन्टरमार्फत उच्चस्तरीय बैंकिङ्ग सेवा प्रदान गर्दै आइरहेको छ ।