काठमाडौं । काठमाडौं उपत्यकामा गत असार २ गतेदेखि देखिएको हैजा संक्रमण फैलिएको छ । असार २२ गतेसम्म आइपुग्दा २१ जनामा हैजा देखिएको छ ।
इपिडिमियोलोजी तथा रोग नियन्त्रण महाशाखाका अनुसार हालसम्म उपत्यकाका सात पालिकामा हैजाका बिरामी भेटिएका छन् ।
हैजाका बिरामी सबैभन्दा धेरै काठमाडौं महानगरपालिका देखिएका छन् । महानगरका १, २, १३, १४, २८ र २९, वडामा ११ जना संक्रमित भएका हुन् ।
महानगर बाहिर चन्द्रागिरीमा २, कागेश्वरी मनोहरामा ३ र बूढानीलकण्ठ नगरपालिकामा १ जना हैजा संक्रमित भेटिएका हुन् ।कीर्तिपुर नगरपालिकामा १, त्यस्तै, ललितपुर महानगरपालिकामा २ र भक्तपुरको चाँगुनारायण नगरपालिकामा १ जनामा संक्रमण पुष्टि भएको छ ।

यसअघि, पहिलोपटक हैजा संक्रमित देखिएको बागबजार क्षेत्रका बिरामीले पिउने गरेको धारा र ट्युबेलको पानीमा इकोली जीवाणु भेटिएको थियो । त्यसपछि संक्रमण देखिएका अधिकांश क्षेत्रको पानीमा सो जीवाणु भेटिएको महाशाखाले जनाएको छ ।
काठमाडौंका धारा, ट्युबेल, इनारको पानीमा इकोली भेटिएकाले पानी उमालेर मात्रै पिउन स्वास्थ्य तथा जनसंख्या मन्त्रालयले अनुरोध गरेको छ ।