काठमाडौँ । जिल्ला प्रहरी परिसर काठमाडौँको कमाण्ड प्रहरी वरिष्ठ उपरीक्षक (एसएसपी) भरत बहादुर बोहराले सम्हालेका छन् ।

कार्यभार सम्हाले​सँगै एसएसपी बोहराले गुण्डागर्दीविरुद्ध शुन्य सहनशीलता अपनाउन निर्देशन दिएका छन् । गोंगबु, दरबारमार्ग र बानेश्वरलगायतका क्षेत्रमा गुण्डागर्दी बढेको सूचना आएको उल्लेख गर्दै उनले भने, ‘गुण्डागर्दी गर्ने र अनावश्यक हैरानी दिनेलाई निगरानीमा राखेर कानुनी दायरामा ल्याउँछौं ।’

बोहरा प्रहरी प्रधान कार्यालयस्थित प्रशासन महाशाखाबाट काठमाडौंमा सरुवा भएका हुन् । गृहमन्त्री बालकृष्ण खाँणले बुधबार बोहरासहित ६ जना एसएसपीलाई काज सरुवा गर्ने निर्णय गरेका थिए ।

यसअगाडि काठमाडौँको कमाण्ड सुदिप गिरिले सम्हालेका थिए । हाल उनी डीआईजीमा बढुवा भएका छन् । डीआईजीमा बढुवा भएसँगै उनले प्रदेश १ को प्रहरी प्रमुखमा सरुवा गरिएको छ ।