काठमाडौँ । श्रीलंकामा जारी आर्थिक र राजनीतिक संकटबीच लगानी प्रबर्द्धन मन्त्री धम्मिका परेराले पदबाट राजीनामा दिएका छन् । पछिल्लो दुई महिनामा पदबाट राजीनामा दिने उनी चौथो मन्त्री हुन् ।

यता, प्रधानसेनापति शवेन्द्र सिल्वाले देशमा शान्ति स्थापना गर्न सुरक्षा निकाय र प्रहरीलाई सहयोग गर्न जनतालाई अपिल गरेका छन् । श्रीलंकामा आर्थिक र राजनीतिक संकटको विरोधमा उत्रिएका प्रदर्शनकारीले हिजो प्रधानमन्त्रीको निजी घरमा आगजनी गरेका थिए ।

प्रदर्शनकारीले प्रधानमन्त्रीको घरमा आगजनी गरेको प्रहरीले जनाएको छ । घटनाको भिडियो खिच्ने क्रममा प्रहरीले जबरजस्ती मानिसको क्यामेरा बन्द गरेको थियो।

यस्तै, आन्दोलनकारीले राष्ट्रपति गोटबायाको निवास कब्जा गरी मस्ती गरिरहेका छन् । अर्कोतर्फ ११६ दिनपछि शनिबार आन्दोलनकारीले राष्ट्रपति गोटाबाया राजापाक्षेको निवास कब्जा गरेका छन् ।

यसैबीच राष्ट्रपति गोटाबायाले जुलाई १३ मा राजीनामा दिने निर्णय गरेका छन् । यसअघि उनका दाजु महिन्द्रा राजापाक्षेले मे महिनामा प्रधानमन्त्री पदबाट राजीनामा दिएका थिए । श्रीलंकामा राजापाक्षे परिवारविरुद्ध यसै वर्ष मार्च १५ मा प्रदर्शन सुरु भएको थियो।

कहाँ बेपत्ता भए राष्ट्रपति ?

श्रीलंकामा प्रदर्शनकारीले राष्ट्रपति निवास कब्जा गरेपछि सबैको मनमा एउटै प्रश्न उब्जिएको छ, गोटाबाया कहाँ हराए ?

स्थानीय सञ्चार माध्यमका अनुसार गोटाबायाले शुक्रबार राष्ट्रपति निवासमा इरानी राजदूतलाई भेटेका थिए । यसपछि उनको बारेमा कुनै जानकारी आएको छैन ।