काठमाडौँ । जल तथा मौसम विज्ञान विभागअन्तर्गतको बाढी पूर्वानुमान महाशाखाले आज देशका १८ जिल्लामा बाढीको खतरा रहेको जनाएको छ ।

दोलखा, रामेछाप, सिन्धुपाल्चोक, काठमाडौँ, ललितपुर, मकवानपुर, धादिङ, लमजुङ, रुकुम पश्चिम, जाजरकोट, दैलेख, कालिकोट, कैलाली, अछाम, डोटी, डडेल्धुरा, बैतडी र दार्चुलामा बाढीको खतरा रहेको छ ।

वर्षाले ती जिल्लामा बहने केही ससाना नदीमा बहाब बढ्ने र केहीमा आकस्मिक बहाबसमेत हुन सक्ने पूर्वानुमान महाशाखाले गरेको छ । बहाब बढ्ने जिल्लाको तटीय क्षेत्रमा रहने सर्वसाधरणलाई सतर्कता अपनाउन महाशाखाले भनेको छ ।

शनिबार प्रदेश १, मधेश प्रदेशको तराई भूभाग र बागमती प्रदेश, सुदूरपश्चिम प्रदेशको पहाडी भूभाग भई बहने ससाना नदीमा बहाब बढ्ने पूर्वानुमान महाशाखाको छ ।

यस्तै, आइतबार प्रदेश १ को पहाडी भूभाग, सुदूरपश्चिम प्रदेशको तराई भूभाग भई बहने केही ससाना नदीमा बाढी आउने पूर्वानुमान छ ।

आगामी तीन दिनसम्म प्रमुख नदी कोशी, नारायणी, कर्णाली, महाकाली, कन्काई, कमला, बागमती, पश्चिम राप्ती, बबई र यसका सहायक नदीको बहाब सामान्य बढ्ने तथा सतर्कता तहभन्दा तलै रहने महाशाखाले जनाएको छ ।