काठमाडौं । हेटौंडामा जारी नेपाल प्रेस युनियनको नवौं महाधिवेशनअन्तर्गत् अहिले मतदान भइरहेको छ । गएराति उम्मेदवारहरूको अन्तिम नामावली प्रकाशन भएसँगै आज ११ बजेदेखि ४ बजेसम्म मतदान हुने कार्यतालिका रहेको निर्वाचन समितिले जनाएको छ ।

प्रतिनिधिहरू मतदानस्थलमा जम्मा भइसकेका छन् । देशभरका १ हजार ६ सय ५० जना प्रतिनिधिले मतदान गर्ने जनाइएको छ । निर्वाचन समितिका अनुसार १ सय १६ पदका लागि २ सय ७ जनाले मनोनयन दर्ता गराएका छन् । उपाध्यक्षसहित विभिन्न पदमा ३१ जना निर्विरोध भइसकेको समितिले जनाएको छ । निर्वाचनबाट ८५ जना चयन हुने छन् ।

करिब ८ वर्षपछि हुन लागेको प्रेस युनियनको महाधिवेशने आगामी ३ वर्षीय कार्यकालका लागि अध्यक्ष १, वरिष्ठ उपाध्यक्ष १, खुला उपाध्यक्ष २, महिला १, समावेशी १, सात प्रदेशबाट प्रतिनिधित्व गर्ने ७ र उपत्यकाबाट १ गरी ८ उपाध्यक्ष, महासचिव १, खुल्ला ३, महिला २, समावेशी १ गरी ६ उपमहासचिव नयाँ पाउँदै छ । खुला ३, महिला २, जनजाति १, मधेसी १, दलित १, खसआर्य १, थारु १, पिछडिएको क्षेत्र १ गरी ११ सचिव र १ कोषाध्यक्ष निर्वाचित हुँदैछन् ।

निर्वाचनमा दुई प्यानल बनेको छ । संस्थापन पक्षबाट अनिता बिन्दु र संस्थापनइतर समूहबाट शिव लम्सालको प्यालन चुनावी प्रतिस्पर्धामा होमिएको छ । अध्यक्ष पदमा भुवन भट्टले पनि उम्मेदवारी दिएका छन् । एक जना वरिष्ठ उपाध्यक्षका लागि दुई जना संस्थापनबाट सरोज अधिकारी र इतर समूहबाट प्रेम केसीको उम्मेदवारी परेको छ ।

उपाध्यक्ष खुलामा संस्थापन इतरबाट राममणि दाहाल, नकुल अर्याल चुनावी मैदानमा छन् । उपाध्यक्ष खुलामै संस्थापनबाट भिष्मराज ओझा र शेखर रेग्मीको उम्मेदवारी परेको छ । उपाध्यक्ष समावेसी पदमा भने संखुवासभाका दिपेन्द्र वान्तवा निर्विरोध निर्वाचित भइसकेका छन् । यसैगरी ११ जना उपाध्यक्षका लागि दुई प्यानलबाट उम्मेदवारी परेको छ । महासचिव पदमा जगन्नाथ दुलाल र दिलिप पौडेलकाबीचमा प्रतिस्पर्धा हुँदैछ ।