काठमाडौँ । नेपाली कांग्रेसका प्रवक्ता डा. प्रकाशशरण महतले आगामी मंसिर ४ गते संघ र प्रदेशसभाको निर्वाचन हुने बताएका छन् ।

शुक्रबार नेपाल प्रेस युनियन नवनिर्वाचित केन्द्रीय कार्य समितिको पदभार ग्रहण एवं प्रमाणपत्र वितरण कार्यक्रमलाई सम्बोधन गर्दै उनले आगामी मंसिर ४ गते संघ र प्रदेश सदस्यको निर्वाचन हुने पक्कापक्की भएको बताएका हुन् । उनले सरकारले केही दिनमै आगामी निर्वाचनको मिति घोषणा गर्ने बताएका थिए ।

‘मंसिर ४ गते त निर्वाचन हुँदैछ, पक्कापक्की छ, केही दिनमा त्यो घोषणा हुन्छ औपचारिक रुपमा,’ उनले भने, ‘नेपाली कांग्रेसको कमजोरी भनेको प्रचारमा छ, हामी आफ्नो पार्टीको विचार संस्थागत विचार राख्न चासो राख्दैनौँ, कसलाई उचाल्ने र कसलाई पछार्ने भन्नेमा हाम्रो धेरै चासो र चिन्ता छ, यसमै लाग्ने हो भने हामी आफ्नो मूल लक्ष्यबाट टाढा हुन्छौँ ।’

प्रवक्ता महतले देशभरकै प्रेस युनियनलाई जागरुक गरेर आगामी निर्वाचनका लागि लाग्नसमेत निर्देशन दिए । कांग्रेसभित्र पार्टीको विचार संस्थागत राख्न चासो नदिने गरेको बताएका थिए । उनले कांग्रेसमा कसलाई उचाल्ने र कसलाई पछार्ने भन्नेमा धेरै चासो हुने गरेको बताए ।