काठमाडौँ । नेपाली कांग्रेसको भातृ संगठन नेपाल राष्ट्रिय मगर संघको सभापतिमा दिनेश थापा मगर सर्वसम्मत चयन भएका छन् । आज बसेको केन्द्रीय समितिको बैठकबाट उनी केन्द्रीय सभापतिमा चयन भएका हुन् ।

कांग्रेसमा लामो समयदेखि विभिन्न जिम्मेवारीमा रहेका थापा मगर पार्टीको सूचना सञ्चार तथा प्रचार विभागको निवर्तमान सचिव हुन् । यस्तै, मगर संघको संस्थापक सचिव, महासचिव, उपसभापति हुँदै उनी सभापतिमा चयन भएका हुन् ।

सभापति चयन भएपश्चात् उनले लोकतन्त्रमा आस्थावान मगर समूदायलाई पार्टी एवं राज्यका विभिन्न तहमा स्थापित गर्न आफ्नो भूमिका हुने बताए । उनले निर्धारित समयमै महाधिवेशन गरी नेतृत्व हस्तान्तरण गर्ने प्रतिबद्धसमेत व्यक्त गरे ।