काठमाडौँ । पर्साको वीरगञ्ज भन्सार कार्यालयका कर्मचारीलाई कुट्ने तीन जना प्रहरी जिल्ला जिकाइएको छ । इलाका प्रहरी कार्यालय इनर्वामा कार्यरत उनीहरूलाई जिल्ला प्रहरी कार्यालयमा जिकाइएको हो ।

सार्वजनिक भएको सीसीटीभी फुटेजमा कुटपिट गरिरहेका तीन प्रहरीलाई सोधपुछका लागि जिल्ला तानिएको हो । कर्मचारी कुट्नेमा एक वरिष्ठ हवल्दार र अर्का दुई जना हवल्दार रहेका छन् ।

उनीहरूले सोमबार राति साढे ११ बजे ड्यूटीमा रहेकाबेला सिभिल प्रहरी भन्दै वीरगञ्ज भन्सार कार्यालयका सहयोगी बमबहादुर विशंखेलाई कुटेका हुन् । घटनापछि न्याय दिलाइदिन भन्दै विशंखेले भन्सार कार्यालयलाई निवेदन लेखेपछि कार्यालयले प्रहरीसँग सहयोग मागेको थियो ।