काठमाडौँ । सत्ता गठबन्धनले काठमाडौँको फोहोर व्यवस्थापन गर्न सरकारलाई आग्रह गरेको छ । फोहोरले महामारी फैलिन सक्ने भन्दै गठबन्धनमा आबद्ध दलहरूले हेरेर नबस्न सरकारलाई आग्रह गरेको हो ।

आइतबार साँझ प्रधानमन्त्री निवास बालुवाटारमा बसेको गठबन्धनका शीर्ष नेताको बैठकले फोहोर व्यवस्थापन गर्न काठमाडौं महानगरका मेयर बालेन शाहसँग छलफल गर्न प्रधानमन्त्री शेरबहादुर देउवालाई आग्रह गरेको छ ।

सरकारका प्रवक्तसमेत रहेका मन्त्री ज्ञानेन्द्र कार्कीका अनुसार बैठकमा कार्यदललाई चाँडोभन्दा चाँडो काम सम्पन्न गर्न निर्देशन गरेको छ । आगामी मंसिर ४ गते हुने संघ र प्रदेशसभा निर्वाचनमा तालमेल गर्ने सहमति गरेसँगै गठबन्धन दलहरूले सिट बाँडफाँटका लागि ११ सदस्यीय कार्यदल बनाएको छ ।