काठमाडौँ । प्रमुख प्रतिपक्ष दल नेकपा एमालेका वरिष्ठ उपाध्यक्ष ईश्वर पोखरेलले मंसिर ४ गते हुने संघ र प्रदेशसभा निर्वाचनमा एमालेको बहुमत आउने दाबी गरेका छन् ।

स्थानीय तह निर्वाचनमा लोकप्रिय मत पाएकाले एमालेले आगामी संघ र प्रदेशसभा निर्वाचनमा बहुमत ल्याउने पोखरेलको तर्क थियो । पार्टी निकट विद्यार्थी संगठन अनेरास्ववियूले सोमबार काठमाडौँमा आयोजना गरेको एक कार्यक्रममा बोल्दै उनले उम्मेदवार तय गर्दा व्यवस्थापकीय कमजोरी भएकाले स्थानीय तह निर्वाचनमा एमाले पहिलो बन्न नसकेको उल्लेख गरे ।

जित्ने र टिक्नेलाई मात्रै पार्टीले निर्वाचनमा उम्मेदवार बनाउने वरिष्ठ उपाध्यक्ष पोखरेलले बताए । ‘आउने निर्वाचनमा एमालेले बहुमतका साथ प्रतिनिधिसभामा पनि आफ्नो प्रतिनिधित्व गर्छ, म यो तपाईहरुलाई बताउनु चाहन्छु, अब तपाईहरुको मनमा प्रश्न उठन सक्छ हिजो स्थानीय तह निर्वाचनमा त भएन नि ?,’ उनले भने, ‘स्थानीय तह निर्वाचनमा हामीले जनताको सर्वाधिक लोकप्रिय मत प्राप्त ग¥यौँ, स्थानीय तह निर्वाचनमा उम्मेदवारी दिने सन्दर्भमा व्यवस्थापकीय कमजोरी भएकाले हामीले सोचेजस्तो परिणाम ल्याउन नसकेको हो ।’

उनले भदौको अन्तिमसम्म आफ्नो पार्टीले संघ र प्रदेशसभा निर्वाचनको उम्मेदवार तय गरिसक्ने बताए । त्यसका लागि मापदण्ड तय गर्न स्थायी समिति, पोलिटब्यूरो र केन्द्रीय कमिटीको बैठक भदौँ दोस्रो हप्ताका लागि तय गरिएको उनको भनाइ थियो ।