काठमाडौँ । आगामी मंसिरमा हुने संघ र प्रदेशसभा चुनावमा नेकपा माओवादी केन्द्रको चुनाव चिह्न लिएर लड्ने भएका डा. बाबुराम भट्टराई माओवादीको केन्द्रीय कार्यालय पेरिसडाँडामा पुगेका छन् । नेपाल समाजवादी पार्टीका अध्यक्षसमेत रहेका उनी आफ्ना पार्टीका नेताहरूसहित पेरिसडाँडामा पुगेका हुन् ।

माओवादीका अध्यक्ष पुष्पकमल दाहाल ‘प्रचण्ड’सँग आगामी चुनावमा नेपाल समाजवादी पार्टीले पाउने सिटबारे छलफल गर्न उनीहरू पेरिसडाँडा पुगेका हुन् । आजै बसेको माओवादीको स्थायी कमिटी बैठकले भट्टराईको पार्टीसहित नेता वामदेव गौतमलाई आफ्नो पार्टीको चुनाव चिह्न गोलाकारभित्रको हसिया हथौडा प्रयोग गर्न स्वीकृति दिने निर्णय गरेको थियो ।

उक्त निर्णयबारे जानकारी गराउन माओवादी केन्द्रबाट शिव खकुरेल र नेसपाबाट खगेन्द्र देवकोटा मंगलबार दिउँसो निर्वाचन अयोग पुगेका थिए ।