काठमाडौं । सत्तारूढ गठबन्धन दललाई सिट बाँडफाँट पेचिलो परेको छ । गत साउन २२ गते कांग्रेसका पूर्व महामन्त्री कृष्णप्रसाद सिटौलाको नेतृत्वमा कांग्रेसका तीन र माओवादी केन्द्र, जनता समाजवादी, एकीकृत समाजवादी र राष्टिय जनमोर्चाका २, २ नेता रहने गरी ११ सदस्यीय कार्यादल बनाएर गृहकार्य गर्न भनेपनि अहिमलेसम्म सिट बाँडफाँटको कुनै आधार नै गठबन्धन दलले भेटाउन सकेका छैनन ।

साउन मसान्तसम्मै काम सक्न कार्यादललाई भनेपनि कार्यादलले कुनै छेकछन्द ल्याउन नसकेपछि शीर्ष नेताहरुसहित नै कार्यादलको बैठक बसेको थियो । बिहिबार विहान बसेको शीर्ष नेतासहितको कार्यादल सदस्य समेत सहभागी बैठक पनि बिना निश्कर्ष सकिएको छ ।

बैठकले घुमाईफिराई कार्यदलतिरै बाँडफाँटको प्रस्ताव ल्याउन निर्देशन गरेको छ।

बिहिबार बसेको बैठकले कार्यदललाई १६५ निर्वाचन क्षेत्रको विस्तृत प्रतिवेदन बनाएर ल्याउन निर्देशन दिएको कार्यदलका सदस्य एवं सञ्चारमन्त्री ज्ञानेन्द्रबहादुर कार्कीले जानकारी दिए ।

‘आज फेरि कार्यदलमै जिम्मेवारी दिने शीर्षस्थ नेताबाट निर्देशन भएको छ,’ उनले भने, ‘कार्यदललाई १६५ नै निर्वाचन क्षेत्रको अवस्था को बारेमा विस्तृत प्रतिवेदन पेस गर्ने जिम्मेवारी प्रदान भएको छ ।’

कार्यदलको बैठक पुनः ४ बजे बस्ने उनले बताए ।

कार्यादलले २०७४ सालमा दलहरुले वितेको निर्वाचन क्षेत्र, त्यसवेला दलहरुले प्राप्त गरेको समानुपातिक मत र अहिलेको स्थानीय तहमा दलहरुको स्थान लाई आधार बनाएर निर्वाचन क्षेत्र वाँडफाँटको प्रतिवेदन बनाउने भनेपनि बनाइएका मापदण्डको ब्याख्यामै दलहरुले आफु अनुकुल गर्न थालेपछि सिट बाँडफाँट पेचिलो बनेको हो ।

त्यसपछि कार्यादलले शीर्ष नेताहरुको मुख ताकेका थिए । शीर्ष नेताहरुको बैठकमा पनि दलहरुका आ आफ्नै ब्याख्या भएपछि फेरि शीर्षले एउटा खाका भएपनि कार्यादलबाटै आओस् भनेर कार्यादलतिरै प्रस्ताव फर्काएका छन् । कार्यादलका एक सदस्यले भने,–‘हामी शीर्ष नेताहरुको मुख ताक्ने, शीर्ष हामीलाई नै भारी बोकाईदिने तिरै छलफल केन्द्रीत भईरहेको छ । कुनै निश्कर्ष निस्कने संकेत देखिएको छैन ।’