काठमाडौँ । आगामी मङ्सिर ४ गते हुने प्रतिनिधिसभा र प्रदेशसभा निर्वाचनका लागि मकवानपुरमा मतदाताको संख्यामा वृद्धि भएको बागमती प्रदेश निर्वाचन कार्यालय हेटौँडाले जनाएको छ ।

निर्वाचनका लागि अहिले मतदाताको संख्यामा वृद्धि भएर तीन लाख ७३३ मतदाता पुगेको सो कार्यालयका प्रमुख लुम्वनाथ पोखरेलले बताए । वैशाख ३० गते सम्पन्न भएको स्थानीय निर्वाचनमा दुई लाख ९४ हजार ९१९ जना मतदाता थिए ।

मकवानपुरमा अहिले पाँच हजार ८१४ मतदाता थपिएको बताइएको छ । मकवानपुरमा एक लाख ५३ हजार ५२८ पुरुष र एक लाख ४७ हजार दुई सय महिला तथा पाँच तेस्रो लिङ्गी रहेको बताइएको छ । मकवानपुरमा प्रतिनिधि तथा प्रदेशसभाका लागि १६७ वटा मतदानस्थल तथा ३६४ वटा मतदान केन्द्र रहको छ ।

आगामी असोज १५ गतेदेखि २० गतेसम्ममा दुई वटा प्रतिनिधिसभा क्षेत्र रहको मकवानपुरमा निर्वाचन अधिकृतको कार्यालय स्थापना हुने कार्यालयले जनाएको छ । निर्वाचनका लागि हाल जिल्लामा म्यादी प्रहरीको छनोट कार्य भइरहको जिल्ला प्रहरी कार्यालय मकवानपुरले जनाएको छ ।