काठमाडौँ । पूर्वप्रधानन्यायाधीश कल्याण श्रेष्ठले सांसदहरू आफै गैरसंसदीय क्रियाकलापमा लागेको भन्दै चिन्ता व्यक्त गरेका छन् ।

नेपाल कानुन समाजले मंगलबार काठमाडौँमा आयोजना गरेको ‘संघीय संसदको पाँच वर्षः एक सिंहावलोकन अनुगमन तथा परीवेक्षण प्रतिवेदन’माथिको छलफलमा भाग लिँदै उनले यस्तो बताएका हुन् ।

पूर्वप्रधानन्यायाधीश श्रेष्ठले सांसदहरू दलको कब्जामा रहँदा संघीय संसदले पाँच वर्षे कार्यकालमा जनताले अनुभूति गर्ने गरी कानुन निर्माणको काम गर्न नसकेको बताए । उनले विकास, निर्माणको काममा बढी ध्यान दिनु पर्ने भएकाले पनि सांसदले कानुन निर्माणको काममा ध्यान दिन नसकेको आरोप लगाए ।

पूर्वप्रधानन्यायाधीश श्रेष्ठले भने, ‘संघीय लोकतान्त्रिक गणतन्त्रअनुसार मुलुकमा रुपान्तरण भएन, जनताले अनुभूति गर्न सक्ने लेवलको काम संसदबाट भएन, त्यसैले यो परिवर्तनको अनुभूति गर्ने बिन्दुमा जसरी ऐनहरू आउनु पथ्र्यो, भएन । त्यो बाध्यतालाई हामीले संसदलाई गैर संसदीय क्रियाकलापमा त लग्दैनौं ? हामीले सांसदहरुलाई गैर संसदीय बनाइराखेका छैनौं ? मलाई यो डर छ ।’

पूर्वप्रधानन्यायाधीश श्रेष्ठले संसदलाई गैर संसदीय प्रक्रियामा लैजाने काम नगर्न राजनीतिक दलहरूलाई आग्रह गरे ।