काठमाडौँ । रुसद्वारा गरिएको गोलाबारीले युक्रेनको दक्षिणी शहर खेरसनमा दुई जनाको मृत्यु भएको छ । उक्त क्षेत्रमा विद्युत कटौतीसमेत भएको छ ।

राष्ट्रपति कार्यालयका उपप्रमुख किरिलो टिमोसेन्कोले सामाजिक सञ्जालमा रुसी सेनाले शहरको केन्द्रमा गोली हानेको बताएका छन् ।

क्षेत्रीय गभर्नर यारोस्लाभ यानुशेभिचले भने, ‘दुई जनाको मृत्यु भएको जानकारी छ, आपतकालीन सेवाहरू तम्तयारी स्थितिमा छन्, आक्रमणले शहरलाई पूर्ण रूपमा ऊर्जाविहीन बनाएको छ ।’

शहरको बन्दरगाह क्षेत्रमा महत्त्वपूर्ण पूर्वाधार सुविधामा भारी गोलाबारी जारी छ । रुसी सेनाले फेब्रुअरीमा युक्रेनमा आक्रमण गरेको केही समयपछि युद्धपूर्व करिब तीन लाख जनसङ्ख्या भएको खेरसनलाई कब्जामा लिएको थियो ।

यद्यपि, युक्रेनको सेनाले नोभेम्बरमा यो सहरलाई महत्त्वपूर्ण रूपमा आफ्नो कब्जामा लिएको थियो ।