काठमाडौँ । जिल्ला प्रहरी कार्यालय मकवानपुरले अवैध अमेरिकी डलर देखाएर ठगी गरेको आरोपमा चार जनालाई पक्राउ गरेको छ ।

बुधबार दिउँसो हेटौँडा १७ सालक पार्कबाट सिन्धुपाल्चोक जिल्ला बाहृबिसे ३ का २१ वर्षीय सोम बहादुर बम्जन, सोही ठाउँका ३३ वर्षीय दिवस बम्जन, बाहृबिसे ४ का २८ वर्षीयका कान्छा तामाङ र त्रिपुरासुन्दरी ३ का २८ वर्षीय सुक्र तामाङलाई पक्राउ गरिएको प्रहरी नायब उपरीक्षक टेक बहादुर कार्कीले बताए ।

उनीहरूको साथबाट एक हजार ७४१ अमेरिकी डलर बरामद गरिएको प्रहरीले जनाएको छ । उनीहरूको साथबाट ६ हजार २१० नेपाली रुपैयाँ, तीन वटा मोटरसाइकल, ८ बण्डल कागजको नक्कली नोट, मोबाइल ५ थान समेत बरामद गरिएको उनले बताए ।

उनीहरूलाई मुलुकी फौजदारी अपराध संहिता २०७४ को दफा २४९, २५२ बमोजिम ठगी आपराधिक विश्वासघात तथा आपराधिक लाभ (एक्टर्सन)सम्बन्धी कसुर तथा संगठित अपराध सम्बन्धी कसुरमा मुद्दा दर्ता गरी कारबाही प्रक्रियाअगाडि बढाइएको प्रहरीले जनाएको छ ।