काठमाडौँ । नेपाल प्रहरीका आइजिपी बसन्तबहादुर कुँवरको अमेरिकाको भ्रमण रद्द भएको छ । अमेरिकामा आयोजना हुने लिडरशिप एक्चेन्ज कार्यक्रममा सहभागी हुने तय भएको उनको भ्रमण रद्ध भएको हो ।

आइजीपी नजाने भएसँगै प्रहरी अतिरिक्त महानिरीक्षक किरण बज्राचार्यको नेतृत्वमा पाँच सदस्यीय टोली सोमबार अमेरिका प्रस्थान गरेका छन् । बज्राचार्यसँगै कार्यक्रममा सहभागी हुनेमा प्रहरी अतिरिक्त महानिरीक्षक सुदिप गिरी, प्रहरी नायव महानिरीक्षक रामदत्त जोशी, प्रहरी वरिष्ठ उपरीक्षक ए.एम. चन्द्र बहादुर धामी र प्रहरी उपरीक्षक सन्तोष खड्का रहेका छन् ।

उनीहरूलाई त्रिभुवन अन्तर्राष्ट्रिय विमानस्थलमा प्रहरी नायव महानिरीक्षक लगायत प्रहरी अधिकृतहरूले शुभ कामनासहित विदाइ गरे । कार्यक्रम वैशाख २७ देखि २९ गतेसम्म वासिङ्टन डि.सी. र न्यूयोर्कमा संचालन हुने भएको हो ।

कार्यक्रममा सुरक्षा चुनौती र आतंकवाद, डिजिटल अपराध, क्रिप्टोकरेन्सी कारोबार लगायतका वित्तीय अपराध अनुसन्धान तथा नियन्त्रण र यससम्बन्धी ज्ञान तथा अनुभव आदान प्रदान हुने छ ।