काठमाडौँ । सशस्त्र प्रहरी बलले सीमा क्षेत्रमा हुने चोरी पैठारी नियन्त्रण गर्ने कार्यलाई तीव्रता दिँदा करिब २४ घण्टाको बीचमा अढाई करोड बढीको अवैध सामान तथा गाडी बरामद गरेको छ ।

सोमबार बिहान १० बजे देखि मंगलबार बिहान ८ बजेसम्म देशभरि सीमा क्षेत्रबाट सशस्त्र प्रहरी बलका विभिन्न युनिटले दुई करोड ५६ लाख ८४ हजार रुपैयाँ बराबरको अवैध सामान नियन्त्रणमा लिएको हो ।

जसमा कोशी प्रदेशका ईलाम, झापा, मोरङ र सुनसरी जिल्लास्थित यूनिटले ४ लाख ८६ हजार रुपैयाँ बराबरको सामान बरामद गरेको छ । यसैगरी मधेस प्रदेशअन्तर्गत सप्तरी, सिरहा, महोत्तरी, सर्लाही, रौतहट, बारा र पर्सा जिल्लास्थित युनिटले २४ घण्टाको बीचमा दुई करोड ३६ लाख २८ हजार रुपैयाँ बराबरको अवैध सामान बरामद गरेको छ ।

त्यसैगरी लुम्बिनी प्रदेश अन्तर्गत रुपन्देही, कपिलबस्तु र बर्दिया जिल्लास्थित यूनिटले १० लाख ७६ हजार ५५ रुपैयाँ बराबरको सामान बरामद गरेको छ ।