काठमाडौँ । कतार पुलिसमा रोजगारीका लागि पठाइदिन्छु भन्दै ठगी गरेको अभियोगमा ताप्लेजुङ आठराई त्रिवेणी गाउँपालिका ४ का एक पुरुष पक्राउ परेका छन् । उनलाई काठमाडौँ महानगर १० थापागाउँबाट पक्राउ गरिएको हो ।

पक्राउ पर्नेमा ४९ वर्षीय रूद्र बहादुर लिम्बु रहेका छन् । उनीले १९ जनालाई वैदेशिक रोजगारीका लागि कतार पुलिसमा एक लाख रुपैयाँभन्दा बढी तलब हुने काममा पठाइदिने भन्दै प्रलोभन देखाएका थिए ।

उनले पीडितहरूबाट पटक–पटक ६९ लाख रुपैयाँ ठगी गरेकाले पक्राउ गरी उपस्थित गराउन वैदेशिक रोजगार विभागबाट पत्राचार भएपछि काठमाडौँ उपत्यका अपराध अनुसन्धान कार्यालय मिनभवनबाट खटिएको प्रहरीले उनलाई पक्राउ गरेको हो ।

उनलाई थप अनुसन्धान तथा कारबाहीका लागि वैदेशिक रोजगार विभाग बुद्धनगर
काठमाडौँ पठाइएको छ ।