ललितपुर । ललितपुर जिल्ला अदालतमा कार्यरत नायब सुब्बा प्रेमिका तामाङलाई कुट्पिट गर्ने अधिवक्ता अमिर लामिछानेले पक्राउ परेका छन् ।

बुधबार अपराह्न ललितपुर जिल्ला अदालतको कार्यकक्षमै काम गरिरहेको बेला अपरान्ह ४ः३० बजे अधिवक्ता लामिछानेले तामाङमाथि हातपात गरेका थिए । मुद्दाको मिसिल र आदेश हेर्न फाइल लिन खोजेपछि महिला कर्मचारी तामाङले मिसिल बाहिर लैजान नदिएपछि उनीमाथि हातपात भएको हो ।

लामिछानेको मुक्का प्रहारबाट तामाङको दुईवटा दाँत हल्लिनुका साथै ओठमा चोट लागेको छ भने सरकारी पोसाकको बाहुलासमेत च्यातिएको छ ।

महिला कर्मचारीमाथि अदालत परिसरभित्रै हातपात भएपछि प्रहरीले लामिछानेलाई नियन्त्रणमा लिई ललितपुर प्रहरीको जिम्मा लगाएको छ । कुटपीटलगत्तै पीडित कर्मचारी तामाङले जिल्ला प्रहरी परिसर ललितपुरमा जाहेरी दिएकी छिन् ।

ललितपुर प्रहरीले आरोपी लामिछाने प्रहरी नियन्त्रणमा रहेको जानकारी दिएको छ ।