काठमाडौँ । सप्तरीको डाकनेश्वरी नगरपालिकाकी उपमेयर मीराकुमारी यादवलाई प्रहरीले पक्राउ गरेको छ। फर्जी कागजपत्र पेश गरेर नागरिकता लिएको आरोपमा प्रहरीले उनलाई पक्राउ गरेको हो । उनले भारतको नागरिकता नत्यागी नेपाली नागरिकता लिएको पाइएपछि प्रहरीले पक्राउ गरेको हो ।

उपमेयर पक्राउ परेपछि उनका श्रीमान भने फरार भएका छन् । उनी नेकपा एमालेबाट गत वर्ष सम्पन्न स्थानीय तह चुनावमा उम्मेदवार बनेर विजयी बनेकी थिइन् ।

सप्तरीकी सूचना अधिकारी एसपी नरेन्द्र कार्कीले उपमेयरलाई नागरिकताका विषयमा पक्राउ गरिएको जानकारी दिए। अहिले उनलाई हिरासतमा राखिएको छ।

उनको भारतीय मतदाता परिचयपत्र र आधारकार्ड पनि फेला परेको छ। उनीहरुविरुद्ध डाक्नेश्वरी नगरपालिकाकै कृष्णकुमार यादवले मुद्दा दर्ता गराएका छन् ।

कृष्णकुमारको जाहेरी जिल्ला प्रहरी कार्यालयले दर्ता गर्न मानेको थिएन । त्यसपछि उनी उच्च अदालत जनकपुरको राजविराज इजलास पुगे । अदालतले आदेश दिएपछि जिल्ला प्रहरी कार्यालयले उपमेयर यादव दम्पतीविरुद्ध मुद्दा दर्ता गरेको थियो ।

सोही मुद्दामा उपमेयर यादव पक्राउ परेकी हुन् ।