काठमाडौं। उपप्रधानमन्त्री एवम् गृहमन्त्री नारायणकाजी श्रेष्ठले ‘सुन पास गराएको’ भन्दै फेसबुकमार्फत भ्रामक प्रचार गर्ने प्रेस चौतारी, नेपालका अध्यक्ष गणेश बस्नेत र सोही किसिमको समाचार लेख्ने जनबोली डटकमविरुद्ध उजुरी दिएका छन् ।

उपप्रधानमन्त्री एवम् गृहमन्त्री श्रेष्ठका तर्फबाट उनका प्रेस संयोजक कमल गिरीले बस्नेतविरुद्ध प्रहरीको साइबर ब्यूरो र जनबोली डटकमविरुद्ध प्रेस काउन्सिलमा बिहीबार उजुरी दिएका हुन् ।

अध्यक्ष बस्नेतले ‘आफुलाई सूचना आएको’ कपोलकल्पित हवाला दिंदै २०८० साल साउन ४ गते फेसबुक स्टाटस्मा गृहमन्त्री श्रेष्ठमाथि ‘सुन पास गराएको’ आरोप लगाएका थिए। यस प्रकरणले गृहमन्त्री श्रेष्ठको व्यक्तिगत निष्ठा, आचरण र नैतिकतामाथि सामाजिक संजालमा अतिरन्जित भ्रम सिर्जना गरेको, सुशासन तथा गुणात्मक प्रशासनिक सुधारमा अनवरत लागेको गृह प्रशासन नेतृत्वलाई हिलो छ्याप्ने काम गरेको र गृहमन्त्रीले अगाडि बढाएका कामलाई अवरुद्ध गर्ने नियत बोकेको श्रेष्ठका तर्फबाट गिरीले दिएको उजुरीमा उल्लेख छ।

बस्नेतले गृहमन्त्रीलाई इंगित गर्दै ‘एक रुपैयाँ पनि आम्दानी नभएका सादगीू व्यक्तिले दैनिक ५० हजार खर्च गर्ने गरेको दाबी समेत बस्नेतले स्टाटसमा गरेका छन्। गिरीले आपराधिक मनोवृत्ति राखेर गृहमन्त्रीप्रति झुठो र कपोलकल्पित आरोप निर्माण गर्ने बस्नेतलाई साइबर कानुन अन्तर्गत आवश्यक कार्वाही गर्न साइबर ब्युरोलाई अनुरोध गरेका गरेका छन्।

इन्द्रप्रसाद आचार्य सम्पादक रहेको जनबोली डटकमले तौलन नसकिने हालसम्मकै ठुलो परिणाममा सुन बरामद, गृहमन्त्री श्रेष्ठको संलग्नता शीर्षकमा गृहमन्त्री श्रेष्ठविरुद्ध आपराधिक मनोवृत्ति राखेर भ्रमपूर्ण समाचार सार्वजनिक गरेको भन्दै यो अनलाइनलाई पनि कारबाही गर्न गिरीले उजुरी दिएका छन् ।