काठमाडौँ । ऋणी महिलालाई लगातार बलात्कार गरी घरजग्गा हडपेको आरोपमा पक्राउ परेका मिटरब्याजी साहु सुर्जमान मालीविरुद्ध मानव बेचबिखनविरुद्धको किटानी जाहेरी दर्ता भएको छ ।

मालीविरुद्ध मानव बेचबिखनको जाहेरी दर्ता गरिएको ललितपुर प्रहरीका प्रवक्ता एसपी नवराज कार्कीले जानकारी दिए । मालीलाई शुक्रबार बेलुका ललितपुर प्रहरीले पक्राउ गरेको थियो ।

श्रीमानको उपचार गर्न ऋणी महिलाले आफन्त पर्ने सुर्जमानबाट ०७५ सालमा ५ लाख रुपैयाँ ऋण लिएकी थिइन् । सुर्जमानले ऋणको मासिक ब्याज ५० हजार तोकेका थिए । नियमित आयआर्जन नभएकी पीडित महिलाले ऋणसापट गरेर मासिक ५० हजारका दरले दुई पटक ब्याज तिरिन् । साँवा घटाउने उद्देश्यले उनले स्वावलम्बन लघुवित्तबाट ऋण लिएर दुई लाख रुपैयाँ सुर्जमानको हातमा थमाए पनि सुर्जमानले साँवा नकटाएर रकमबाट ब्याज मात्रै कटाइदिए ।

सुर्जमान मागेको एकमुष्ट साँवा र ब्याज एकैपटक तिर्न नसकेपछि सुर्जमान र उनका साथीहरुले ब्याज घटाइदिने भन्दै उनीमाथि चार पटक बलात्कार गरेको प्रहरीको अनुसन्धानमा खुलेको छ ।

बलात्कारको विषय सबैलाई भनिदिने भन्दै उनीहरूले तमसुक गराएर महिलाको घरजग्गासमेत कब्जा गरेका थिए । उनले ऋणी महिलाबाट ब्याजसहित ८० लाख ८२ हजार २ सय २७ रुपैयाँ भुक्तान हुनुपर्ने ललितपुर अदालतबाट फैसलासमेत गराएका थिए । त्यसपछि घर र जग्गा हडपेर ७९ लाख भुक्तान लिएका थिए । बाँकी एक लाख ८२ हजार २ सय २७ ‘असुलउपर गरी प्रतिवादीबाट भराइपाऊँ’ भन्दै सुर्जमानले ०७८ मंसिर ९ मा निवेदन दिएका थिए ।