काठमाडौं । चिनियाँ तस्करहरुले सुन तस्करी गर्न नेपालीलाई प्रयोग गरेर सात वटा कम्पनी नेपालमा खोलेको तथ्य खुलेको छ । नेपाल प्रहरीको केन्द्रीय अनुसन्धान ब्यूरोले गरेको अनुसन्धानबाट त्यस्तो तथ्य बाहिरिएको हो ।

६० किलो सुन प्रकरणको अनुसन्धान गरेको सीआइबीले बुधबार पत्रकार सम्मेलन गरेर त्यस्तो जानकारी गराएको हो । त्यसरी खोलिएका ७ मध्ये ६ वटा कम्पनीबाट भने तस्करीका सामान कुनै न कुनै रुपमा आएको र एउटाबाट मात्र नआएको सीआइबीको अनुसनधानमा उल्लेख छ ।

सीआईबीका एसपी सञ्जयसिंह थापाले सुन तस्करीमा ७ वडा कम्पनी खडा भएको जानकारी दिएका हुन् ।

उनका अनुसार छुङ्गाक इलेक्ट्रिक सप्लायर्स, भुजेल इलेक्ट्रिक सप्लायर्स, ह्वाडा इलेक्ट्रिक सप्लायर्स, पवाटी इलेक्ट्रिक सप्लायर्स, दोलखा इलेक्ट्रिक सप्लायर्स, रेडी ट्रेड र सरिता सप्लायर्स कम्पनी खडा भएको पाइएको हो ।

यी कम्पनीका मालिकमा क्रमशः लेखनाथ कार्की डोली, रामकुमार भुजेल, कुमार बहादुर भुजेल, रामबहादुर भुजेल, विकुन्द्र भुजेल, दिलीप भुजेल र सरिता तामाङ रहेका छन् ।

सीआईबीले तस्करीका सुनहरु टोखा र लाजिम्पाटमा गाल्ने गरेको खुलेको पनि जनाएको छ ।