काठमाडौँ । कोशी प्रदेशका मुख्यमन्त्री केदार कार्कीले कांग्रेसको संस्थापन पक्ष र संघीय सत्ता गठबन्धनका सहयात्री दललाई पहिलो चरणमा सरकारमा सहभागी गराएनन् ।

एमाले र कांग्रेसका विद्रोही ८ सांसदको हस्ताक्षरबाट मुख्यमन्त्री नियुक्त भएका कार्कीले पहिलो चरणमा आफूलाई सहयोग गर्नेहरूलाई मात्रै मन्त्री बनाएका हुन् । कांग्रेसको विद्रोही समूह र एमालेबाट मात्रै पहिलो चरणमा मन्त्री बनाएका छन् ।

कार्की मुख्यमन्त्री भएपछि कांग्रेसको कोशी प्रदेश संसदीय दलका नेता उद्धव थापाले राजीनामा दिइसकेका छन् । प्रमुख सचेतक भूपेन्द्र राईसँग कार्कीले मन्त्रिपरिषद् विस्तारबारे कुनै कुराकानी गरेका छैनन् । ‘मन्त्रिपरिषद् गठनका विषयमा मुख्यमन्त्रीज्यूले मसँग कुनै कुराकानी गर्नुभएको छैन,’ राईले भने । राईले आफूसँग मुख्यमन्त्रीको कुनै टेलिफोन सम्वाद पनि नभएको बताए ।

कार्कीले प्रदेश प्रमुख परशुराम खापुङबाट आजै मुख्यमन्त्रीको शपथ लिएका छन् । शपथलगत्तै कांग्रेस शेखर कोइराला पक्ष र एमालेबाट एक एक जना मन्त्री नियुक्त गरेका छन् ।

एमालेबाट राम राना कांग्रेसबाट शमशेर राई मन्त्री बनेका छन् ।

एमालेका ३९ र कांग्रेस शेखर पक्षका ८ गरी ४७ सांसदको समर्थनबाट कार्की मुख्यमन्त्री नियुक्त भएका थिए ।

मुख्यमन्त्री नियुक्त भएलगत्तै काठमाडौं आएका कार्कीले शेखर र कांग्रेस सभापति शेरबहादुर देउवालाई भेटेपछि बालकोट पुगेर एमाले अध्यक्ष केपी शर्मा ओलीलाई पनि भेटेका थिए ।