काठमाडौं । त्रिभुवन अन्तर्राष्ट्रिय विमानस्थलको सुरक्षार्थ खटिएका प्रहरी जवान जीवराज तामाङ मानव तस्करीमा संलग्न भएका आरोपमा पक्राउ परेका छन्। काठमाडौं उपत्यका अपराध अनुसन्धान कार्यालयबाट खटिएको विशेष टोलीले जवान तामाङलाई पक्राउ गरेको हो।

तामाङले मानव तस्करको गिरोहसँग मिलेर नक्कली कागजात बनाउने र भिजिट भिसामा सर्वसाधारणलाई दुबईलगायत खाडी मुलुक पठाउने गरेको प्रारम्भिक अनुसन्धानले देखाएको कार्यालयले जनाएको छ।

कार्यालय स्रोतले तामाङ मानव तस्करका गिरोहसँग मिलेर भिजिट भिसामा सर्वसाधारणलाई खाडी मुलुक उडाउने कार्यमा संलग्न थिए। यसबारे प्रहरीले थप अनुसन्धान सुरू गरेको बताएको छ।

प्रहरीले उनको थप कनेक्सनबारे अनुसन्धान भइरहेको जनाएको छ । पक्राउ परेका तामाङ विगत तीन वर्षदेखि त्रिभुवन अन्तर्राष्ट्रिय विमानस्थलमा कार्यरत थिए ।