काठमाडौँ । नेपाल सुपर लिग एनएसएलमा आज भएको पहिलो खेलमा स्पोर्टिङ इलामले धनगढी एफसीसँग बराबरी खेलेको छ ।

दशरथ रंगशालामा स्पोर्टिङ इलामले आफ्नो पाँचौं खेलमा शनिबार दुई गोलको अग्रता जोगाउन नसक्दा धनगढी एफसीसँग २–२ को बराबरी नतिजा सामना गरेको हो। अन्तिम २१ मिनेटमा दुई गोल फर्काउँदै धनगढीले हारको संकट टार्‍यो।

दोस्रो हाफमा उत्कृष्ट पुनरागमन गरेको धनगढी शीर्ष स्थानमा फर्किएको छ । पोखरा थन्डर्ससँग अङ्क बराबरी गरेको धनगढी बढी गोल गरेको आधारमा शीर्ष स्थानमा उक्लिएको हो ।

यस्तै, आजै हुने अर्को खेलमा काठमाडौँ रेजर्स फुटबल क्लब र बुटवल लुम्बिनी खेल्दै छन् । खेल बेलुका ५ बजे हुनेछ ।

काठमाडौँ तालिकाको चौथो स्थानमा छ भने बुटवल लुम्बिनी छैटौँ स्थानमा छ । हिजो भएको खेलमा झापा एफसी र वीरगञ्ज युनाइटेड एफसीले गोलरहित बराबरी खेल्दै अङ्क बाँडेका थिए ।