धनगढी । कञ्चनपुरको लालझाडीमा पाँच महिना अगाडी मारिएका एक युवकको हत्या प्रकरणको अनुसन्धानमा प्रहरी नै तानिएको छ । पीडित परिवारको जाहेरीका आधारमा प्रहरीले दुई जनालाई पक्राउ गरेको छ । पक्राउ पर्नेमा एक जना साहायक प्रहरी हवलदार समेत छन् ।

पक्राउ पर्नेमा सहायक प्रहरी हवलदार महेश चौधरी र चेतराज भण्डारी छन् । गत असोज २८ गते लालझाडी गाउँपालिका-३ का २८ वर्षीय राजकुमार रानाको शव कृष्णपुर नगरपालिकाको बालुवाफाँटा जंगलमा भेटिएको थियो । घटनामा प्रहरीले पाँच महिना वित्दासम्म कसैलाई पक्राउ गर्न सकेको थिएन ।

जिल्ला प्रहरी कार्यालय कैलालीका प्रहरी प्रवक्ता प्रहरी नायव उपरीक्षक (डीएसपी) प्रकाश डांगीले पक्राउ पर्ने चौधरी प्रहरी सहायक हवल्दारसमेत रहेको खुलासा गरेपछि घटनामा प्रहरी नै समेत तानिएको हो ।

पक्राउ पर्नेलाई केही दिनअघि मात्र इलाका प्रहरी कार्यालय झलारीको टोलीले पक्राउ गरेर अनुसन्धान गरिरहेको छ । मृतक रानाको श्रीमती सुशीला रानाले आफनो श्रीमानलाई प्रहरी साहायक हवल्दार चौधरीसहितले हत्या गरेको किटानी जाहेरी दिएपछि प्रहरीले उनीहरुलाई पक्राउ गरेको हो ।

१८ असोजमा श्रीमती सुशीला रानालाई फोन गरेर अत्तरियामा श्रृंगारका सामान बिक्रीको काम गरिरहेको बताएका राना दशैं मनाउन घर फर्किने कुरा थियो । तर, त्यसको १० दिनपछि २८ असोजमा कृष्णपुर नगरपालिकामा पर्ने बालुवाफाँटाको जंगलमा मृत भेटिएको खबर परिवारले पाएको थियो ।

२० असोजदेखि परिवारसँग सम्पर्क नभएपछि राजकुमारको परिवारले नातागोतासँग उनीबारे सोधीखोजी गरेका थिए ।राजकुमारले गर्ने गरेको कामका बारेमा परिवारमा कुनै जानकारी थिएन । उनले पनि परिवारमा कामको प्रकृतिका बारेमा खास बताएका थिएनन । धनगढीमा काम गर्ने गरेको मात्र राजकुमारले परिवारलाई बताएका कारण पनि प्रहरीले अनुसन्धानमा विलम्ब गरिरहेको थियो ।

तर बेलाबेला राजकुमारको नाम जोडेर र उनले बेलौरीकै नन्दकली रानाको खाताबाट तीन लाख रुपैयाँ झिकेको भन्दै त्यो रकम माग्न बेलौरी नगरपालिका वडा नम्बर ८ का वडाध्यक्ष विषराम राना समेतको टोली घरमै पुगेर परिवारलाई धम्काएकोले पनि परिवार त्रसित थिए । त्यही पेरीफेरीमा राजकुमारको शव भेटिएपछि परिवारले उनको हत्या नै भएको भन्दै दोषी पक्राउ गर्न प्रहरीलाई दवाव बढाईरहेको थियो । तर प्रहरीले कुनै जानकारी परिवारलाई दिएको थिएन । प्रहरीले घटनाको अनुसन्धानमात्र भईरहेको बताउँदै आएको थियो ।

त्यसमाथी राजकुमार मारिनु अगाडी प्रहरी हिरासतमै रहेको भन्नेजस्ता विषय पनि सार्वजनिक हुन थालेपछि परिवारले प्रहरीमाथी अनुसन्धानका लागि थप दवाव बढाउन थालेका थिए ।

कृष्णपुर नगरपालिका–३ को देखतभूली बस्ने राजकुमारकी दिदी रजनी रानाले दाजु नाता पर्ने राजेश रानाबाट राजकुमार प्रहरीको थुनामा रहेको सूचना पाएकी थिइन् ।

राजेशले कृष्णपुर नगरपालिकाकै चेतराज भण्डारीले भनेको भन्दै रजनीलाई राजकुमार पक्राउ परेको बताएका थिए । सो क्रममा भण्डारीले राजकुमारलाई नेपाल प्रहरीको घुमुवा (सादा पोशाकका प्रहरी) ले गुलरियाको जंगलमा रहेको नर्सरीमा लखेटिरहेको अवस्थामा देखेको बताएको अडियो समेत सार्वजनिक भएको थियो ।

त्यसपछि घटना रहस्यमय बनेको थियो ।

घटनाको पाँच महिना पुग्दा समेत रानाको हत्या कसले गरेको भन्ने कुनै सुइको नपाएको प्रहरीले मृतकका श्रीमतीकै किटानीका आधारमा साहायक प्रहरी हवल्दारसहित २ जनालाई पक्राउ गरेपछि प्रहरी नै अनु्सन्धानमा तानिएको हो ।