काठमाडौं ।  जर्मनीको चर्चित युथ फुटबल प्रतियोगिता भिआर बैंक कपमा नेपालको काठमाडौँ किकर्सले आफ्नो अपराजित यात्रालाई निरन्तरता दिएको छ ।

सोमबारसम्म किकर्सको यू–१४ टोलीले १२ मध्ये ८ खेलमा जित तथा ४ खेलमा बराबरीको नतिजा निकालेको छ । किकर्सले २८ अंक जोडेको छ ।

यससँगै प्रतियोगितामा टोलीको एक खेल बाँकी रहँदा उपाधिको सम्भावना पनि बलियो बनेको छ ।

सोमबार भएको ३ खेलमध्ये किकर्सको यू–१४ टोलीले २ खेलमा जित र १ खेलमा बराबरीको नतिजा निकालेको थियो ।

सोमबारको पहिलो खेलमा किकर्सले आयोजक मोम्मेन्डोर्फको दोस्रो टोलीसँग १–१ गोलको बराबरीको नतिजा निकाल्यो । नेपाली टोलीका लागि आशुतोष महोत्राले गोल गरेका थिए ।

दिनको दोस्रो खेलमा किकर्सले एसभी अउबीङलाई १–० गोलले पराजित गरेको थियो । किकर्सको जितमा आर्यबीर सिंहले निर्णायक गोल गरेका थिए ।

टोलीले तेस्रो खेलमा भने एसभी जमरिङमाथि ३–० गोल अन्तरको जित दर्ता गर्‍यो । किकर्सको जितमा नोर्गेल शेर्पा, आशुतोष महोत्रा र गुगल बसौलाले १–१ गोल गरे । प्रतियोगितामा बाँकी रहेको अन्तिम खेलबाट टोलीको उपाधिको टुङ्गो लाग्ने छ ।

किकर्सको यू–१४ टोली रहेको यस समूहमा जर्मनीको विभिन्न एकेडेमीका अन्य ९ टोली सहभागी छन् । नेपाली टोलीले राउण्ड रोविन र फाइनल चरणको आफ्ना कुनै पनि खेलमा पराजय व्यहोरेको छैन । किकर्सको यू–११ टोलीको भने उपाधि सम्भावना सकिएको छ ।