ललितपुर।मानव स्वास्थ्यका लागि हानिकार मानिएको लेड (सिसा) सम्बन्धि ओरियन्टेसन कार्यक्रम सम्पन्न भएको छ ।

ललितपुरमा सम्यक डाइग्नोष्टिक प्रा.लि. र माला ब्युटी एसेर्स्स नेपालको सहकार्यमा एक दिने लेड सम्बन्धी ओरियन्टेसन कार्यक्रम सम्पन्न भएको हो । सम्यकका अध्यक्ष तथा वरिष्ठ प्याथोलोजिष्ट डा.केयुर गौतमले कस्मेटिक प्रडक्टमा हुने लेड (सिसा), यसले पार्ने प्रभाव र बच्ने उपायका विषयमा प्रकाश पारेका थिए ।

उनले कस्मेटिक प्रडक्टहरुमा केही न केही मात्रामा लेड रहने भएकाले लेड सेफ प्रडक्ट प्रयोग गर्न सुझाव दिएका थिए । ‘सकेसम्म लेड सेफ कस्मेटिक प्रडक्टहरु प्रयोग गर्न आग्रह गर्न चाहन्छु,’ डा. गौतमले भने, ‘नत्र हामी बुद्धका देशमा मानिस वुद्धु हुन बेर छैन् ।’ डा. गौतमले लेडबाट बच्न अपनाउन सकिने सावधानीलगायतका विषयमा पनि विशेष प्रस्तुती दिएका थिए ।

उनले लेडबाट बच्न ग्लब्सको प्रयोग गर्ने, पटक/पटक हात धुने, मास्कको प्रयोग गर्ने, कार्यकक्ष सफा राख्ने, कार्यक्षेत्रमा खाना नखानेजस्ता सुझावहरु दिएका थिए । नेपालमा लेड प्रयोग न्यूनीकरणबारे सचेतनामा काम गरिरहेका डा. गौतमले लेडले मानिसको आईक्यु क्षमतामा प्रभाव पार्ने भएकाले बालबालिकाहरुलाई पनि यसबाट बचाउनुपर्ने सुझाव दिए ।

कार्यक्रममा माला ब्युटी एसेर्स्स नेपालकी अध्यक्ष विमला रिजाल ढुंगेलले आफूहरु लेडको अति जोखिमयुक्त क्षेत्रमा काम गर्ने भएकाले ओरियन्टेसन निकै उपयोगी भएको बताइन् । कार्यक्रममा सम्यक डाइग्नोष्टिक निःशुल्क लेड परीक्षण समेत गरेको थियो । कार्यक्रममा ५० जनाभन्दा बढी ब्युटिसियनहरुको उपस्थिती रहेको थियो ।