काठमाडौं । प्रतिपक्ष दल राष्ट्रिय स्वतन्त्र पार्टी (रास्वपा)की सांसद तोसिमा कार्कीले नयाँ सरकारमा दलित समुदायको प्रतिनिधित्व नभएकोमा आपत्ति जनाएकी छन् ।

सोमबार बसेकाे प्रतिनिधिसभा बैठकमा सांसद कार्कीले महिलाहरूको प्रतिनिधित्व पनि कम भएको भन्दै सरकारमाथि प्रश्न उठाएकी छन् ।

“दुई ठूला दल मिलेर बनेको सरकारको जम्बो मन्त्री टोलीमा जम्मा दुई महिला अटाउन सकेछन् । आधा आकाश ढाक्ने महिलाको प्रतिनिधित्व ५० प्रतिशत हुनुपर्नेमा ३३ प्रतिशत चाहिँ हामी अनिवार्य गराउँछौँ भन्ने दुई ठूला दलको ३३ प्रतिशत भनेको २२ को २ हुँदो रहेछ । तपाईंहरूको गणित कमजोर हो कि नियतमै खोट हो ? महिला अधिकार कहाँ गयो ? संविधान र लोकतन्त्रको मूल्यमान्यता कहाँ गयो ?,” सांसद कार्कीले प्रश्न गरिन् ।

उनले जनताको हित हुने गरी काम गर्न पनि सरकारलाई शुभकामना समेत दिएकी छन्।