काठमाडौँ । काभा यू–१९ महिला भलिबल च्याम्पियनसिपमा नेपाली महिला टोलीले पहिलो जित निकालेको छ।

माल्दिभ्सको मालेस्थित सोसल सेन्टरमा शनिबार भएको खेलमा घरेलु टोली माल्दिभ्सलाई ३–० को सोझो सेटमा पराजित गर्दै नेपालले पहिलो जित दर्ता गरेको हो।

आजकाे खेलमा नेपालले माल्दिभ्सलाई २५-१६, २५-९, २५-१० ले पराजित गर्‍याे । यसअघि नेपाल पहिलो खेलमा श्रीलंका र दोस्रो खेलमा किर्गिस्तानसँग पराजित भएको थियो ।

याे जितसँगै नेपाल सेमिफाइनलमा दोस्रो स्थानमा रहने टोलीसँग प्रतिस्पर्धा गर्नेछ । श्रीलंका र किर्गिस्थानबीच हुने खेलले पहिलो र दोस्रो स्थानमा रहने टोलीको टुंगो लाग्नेछ ।

फाइनल खेल सोमबार हुनेछ ।