काठमाडौं । नेकपा (एमाले)ले सहकारी संस्थाको बचत रकम ठगी प्रकरणमा संसदीय समितिको प्रतिवेदनानुसार छानबिन गर्दा प्रधानमन्त्री केपी शर्मा ओली र सरकारविरुद्ध गालीगलौच गरिएकामा आपत्ति जनाएको छ ।

एमालेका महासचिव शंकर पोखरेलले बिहीबार विज्ञप्तिमार्फत छानबिनको प्रक्रियालाई प्रभावित पार्ने गरी भ्रम सिर्जना गरिएको बताएका छन् । “संसदीय छानबिन समितिले सर्वसम्मत रूपमा औँल्याएको विषयमा छानबिनको प्रक्रिया अघि बढिरहेको अवस्थामा सम्माननीय प्रधानमन्त्री र नेपाल सरकारका जिम्मेवार व्यक्ति र निकायका विरुद्धमा जिम्मेवार व्यक्तिहरूबाटै अमर्यादित अभिव्यक्ति दिने, गालीगलौच गर्ने र गलत आक्षेप लगाउँदै छानबिनको प्रक्रियालाई प्रभावित गर्ने गरी भ्रम सिर्जना गर्ने र अस्वस्थ वातावरण सिर्जना गर्ने काम हुनु अत्यन्त दुःखद विषय हो,” विज्ञप्तिमा भनिएको छ, “फौजदारी मुद्दाको अनुसन्धान, अभियोजन र प्रतिरक्षालाई स्वतन्त्र, भयरहित र वैज्ञानिक बनाई फौजदारी न्याय प्रणालीको प्रभावकारिता बनाउनु सबैको साझा दायित्वको हो ।”

एमालेले राष्ट्रिय स्वतन्त्र पार्टी (रास्वपा)लाई अनुसन्धानमा बाधा पुर्‍याउने गतिविधि नगर्न आग्रह गरेको छ । “हाम्रो पार्टी अख्तियारप्राप्त निकायबाट भइरहेको अनुसन्धान र अभियोजनको प्रक्रियामा बाधा पुर्‍याउने खालका कुनै पनि प्रकारका गतिविधि नगर्न सम्बन्धित सबै पक्षको ध्यानाकर्षण गर्दछ,” विज्ञप्तिमा उल्लेख छ, “नेपाल सरकारलाई समेत त्यसप्रकारको गतिविधि नियन्त्रण गर्न स्वच्छ र निष्पक्ष न्यायिक निरूपणको वातावरण तयार गर्न अनुरोध गर्दछ ।”