काठमाडौं। मोरङको कटहरी गाउँपालिका-२ मा अर्धचेत अवस्थामा फेला परेकी महिलाको बलात्कार भएको खुलासा भएको छ ।

मंगलबार मोरङको जहदा गाउँपालिका-३ की २३ वर्षीय महिला घरदेखि करिब २ किलोमिटर टाढा कटहरी गाउँपालिका-२ मा पर्ने खेतबारीको बीचमा रहेको बाँसको झ्याङमा सलले मुख थुनेर हातखुट्टा बाँधेको अवस्थामा अचेत अवस्थामा फेला परेकी थिइन् । प्रहरीले उनको उद्धार गरी कोशी अस्पताल भर्ना गरेको थियो ।

होस खुलेपछि ती महिलाले आफूमाथि बलात्कार भएको बयान दिएकी हुन् । उनको बयानका आधारमा प्रहरीले तीन जनालाई पक्राउ गरेको छ ।

पक्राउ पर्नेहरुमा कटहरी गाउँपालिका-२ का १९ वर्षीय मोहम्मद रमजान सोही स्थानका १९ वर्षीय सोनुकुमार साह र भारतको अररीया कुशाकट्टा बस्ने १९ वर्षीय मो गुल्जार छन् ।

यस घटनामा थप अनुसन्धान भइरहेकाे प्रहरीले जनाएकाे छ ।