मुम्बइ। बलिउड अभिनेता सैफ अली खानमाथि आक्रमण गर्नेबारे नयाँ खुलासा भएकाे छ ।

हमलाका अभियुक्त शरीफुल इस्लाम शहजाद सैफमाथि हमला गरेपछि फरार भएका थिए । प्रहरी र मुम्बई क्राइम ब्रान्चको दर्जनौं टोलीले उनलाई दिनरात लगाए खोजेका थिए ।

पक्राउ परेपछि अभियुक्तले आफ्नो परिचय नक्कली दिएका थिए । तर, प्रहरीले सत्यतथ्य खुलाउन र सत्यतथ्य प्रमाणित गर्न उनीसँग सोधपुछ गर्दा उनको मोबाइलमा बंगलादेशबाट स्कुल छोडेको प्रमाणपत्र फेला परेपछि असली परिचय खुलेको थियो ।

अभियुक्तलाई आइतबार प्रहरी चौकीबाट पक्राउ गरिएको हो । सुरुमा अभियुक्तले अनुसन्धान अधिकारीलाई बहकाउन गलत सूचना दिए । उनले आफू कोलकाताको बासिन्दा भएको दाबी गरेका थिए । र, अभियुक्तले यसअघि प्रहरीलाई आफ्नो नाम विजय दास बताएको थिए ।

पछि उनको नाम शरीफुल इस्लाम शहजाद मोहम्मद रोहिल्ला अमिन फकीर भएको खुलासा भयो । अभियुक्तको उमेर ३० वर्ष रहेको छ ।

प्रारम्भिक अनुसन्धानको आधारमा एक प्रहरी अधिकारीले भने, “आक्रमणपछि फकिर सैफ अली खान बस्ने सतगुरु शरण भवनको बगैंचामा लुकेका थिए। पक्राउ पर्ने डरले उनी करिब २ घण्टा त्यहीँ लुकेर बसे ।’ उनी ठूलो रकम चोर्ने नियतले नै साे अपार्टमेन्टमा प्रवेश गरेको प्रहरीले जनाएको छ ।

वास्तवमा पक्राउ परेपछि पुलिसलाई झुक्याउन उनले आफू कोलकाताको र आफ्नो नाम विजय दास हो भनेका थिए । यद्यपि उनले यो प्रमाणित गर्ने कुनै कागजात देखाउन भने सकेनन्। त्यसपछि सोधपुछका क्रममा उनले वास्तविकता खुलाएका थिए ।

प्रहरीले भन्यो, “उनले आफ्नो भाइलाई फोन गरेर आफ्नो स्कूल छोडेको प्रमाणपत्र पठाउन भने। उसको भाइले उनलाई फकिरको फोनमा पठायो। यो कागजात उनी बंगलादेशको नागरिक भएको प्रमाणित गर्ने बलियो प्रमाण हो।’