एजेन्सी । रुसको रियाजानमा रहेको तेल प्रशोधन केन्द्र र मस्कोमा कम्तीमा १२१ ड्रोनले निशाना बनाएको युक्रेनले दाबी गरेको छ । 

रुस र युक्रेन बिच चलिरहेको युद्धमा युक्रेनले यो आफ्नो प्रकारको एक मात्र ठुलो अपरेसन भएको बताएको छ । बी.बी.सी.ले प्रमाणित गरेको भिडियो फुटेजले मस्कोको दक्षिणपूर्वमा रहेको रियाजान क्षेत्रमा रिफाइनरी र पम्पिङ स्टेसनमा आगो लागिरहेको देखाउँछ । 

अनतर्राष्ट्रिय सञ्चार माध्यमका अनुसार युक्रेनी अधिकारीहरूले यो रिफाइनरीलाई लक्षित गरी आक्रमण गरिएको बताएका छन् । रुसले १३ क्षेत्रमा १२१ युक्रेनी ड्रोन खसालेको बताएको छ । जसमा मस्को र रियाजान क्षेत्रहरू समावेश छन् । रुसले कुनै पनि प्रकारको क्षतिको बारेमा जानकारी भने दिएको छैन । 

अर्को तर्फ युक्रेनले कीएभको एक आवासीय भवनमा रुसले गरेको ड्रोन आक्रमणमा तीन जनाको मृत्यु भएको र एक जना घाइते भएको जानकारी दिएको छ ।