काठमाडौं । राप्रपाका अध्यक्ष राजेन्द्र लिङ्देनले सरकार नसुध्रिए बालुवाटार घेरेर भातपानी बन्द गर्ने चेतावनी दिएका छन् ।

मंगलबार काठमाडौंको बल्खुमा आयोजना गरेको पार्टीकाे खबरदारी सभालाई सम्बोधन गर्दै लिङ्देनले यस्तो चेतावनी दिएका हुन् ।

‘नसुध्रने हो भने हामी पनि गाेली चलाउँछौ त भन्दिनँ तर बालुवाटार घेरेर भातपानी बन्द गर्न सक्छौ’, लिङ्देनले भने, ‘आज राप्रपा बल्खु गयो भनेर कमजोरी नठान्नु । शान्ति अहिंशालाई कमजोरी नठान्नु केपी ओलीजी, गृहमन्त्रीजी ।’

आफ्ना नेताहरुलाई हतकडी लगाएको विषय राप्रपाले इखको रुपमा लिएको लिङ्देनले बताए । उनले गणतन्त्र कति कमजोर रहेछ भनेर देखाउन आएको भन्दै राज्यआतंक सधै नचल्ने चेतावनी दिए ।

‘सत्ता सधैभरी तपाईंको हातमा हुँदैन, जनता गोठको गाइबस्तु होइनन्’, प्रधानमन्त्री र गृहमन्त्रीलाई चेतावनी दिँदै भने, ‘जतिदिन हाम्रा साथिहरुलाई थुन्नुहुन्छ यो जनमत दिनदुई गुणा रात चौगुणा बढेर जान्छ । देशमा राजा चाहिन्छ भन्नु राज्यविरुद्धको अपराध हो ?’