काठमाडौं । हुम्लाको नाम्खा गाउँपालिका–५ स्थित तिलगाउँमा एक्कासि आएको बाढीबारे काठमाडौंबाट गएको अध्ययन टोली सदरमुकाम सिमकोट पुगेको छ । जिल्ला प्रशासन कार्यालय हुम्लाका प्रमुख जिल्ला अधिकारी नारायण पाण्डेले आज बिहानमात्र विज्ञ टोली पुगेको जानकारी दिए ।

“आज बिहान विज्ञ टोली आइपुगेको छ । केहीबेरैमै तिलगाउँ जाँदै हुनुहुन्छ,” पाण्डेले भने । 

जेठ १ गते हिमतालमुनि जमेको ‘लेदो बग्दा’ तिलगाउँको तिल्चुङ खोलामा बाढी आएको थियो । बाढीबाट २१ घरधुरीका ३३ जना प्रभावित बनेका थिए । उनीहरू पालमुनि बसिरहेकाे वडा नम्बर ६ का अध्यक्ष पाल्जोर तामाङले बताए । उनका अनुसार घोडा, खच्चडबाट राहत सामग्री ओसार्ने काम भइरहेको छ ।