काठमाडौं । कोरोनाका गम्भीर विरामीहरुलाई प्रयोग हुने रेम्डेसिभिर इन्जेक्सनको थप ४ हजार भाइल आज काठमाडौँ आइपुग्ने भएको छ । औषधि व्यवस्था विभागले इन्सेक्ट्रा बंगलादेशबाट १० हजार भाइल रेम्डेसिभिर ल्याउने अनुमति दिएपछि आयत प्रक्रिया शुरु गरेको आयान हेल्थकेयर प्रालिले आज ४ हजार भाइल रेम्डेसिभिर काठमाडौँ भित्र्याउन लागेको हो ।

आयानका अध्यक्ष मोह्मद सानी ठकुराईले बंगलादेशबाट एक साता अघि नै औषधि बोकेको गाडी हिडे पनि सार्वजनिक विदा र अन्य विविध कारणले औषधि आइपुग्न केही ढिलाई भएको बताए ।

उनले थप औषधि आगामी साता भित्रै ल्याई पुर्याउँने बताए । सो कम्पनीलाई विभागले अहिले थप २५ हजार भाइल रेम्डेसिभिर ल्याउन अनुमति दिईसकेको छ ।

दुई दिन अघि मात्रै हाम्रो मेडि कन्सर्नले बंगलादेशबाट ३ हजार भाइल रेम्डेसिभिर ल्याएको थियो । सो औषधि आएकै दिन अधिकांश उपत्यकाका अस्पताल र केही उपत्यका बाहिरका अस्पतालमा वितरण गरिएको थियो ।