दोलखा । जिल्ला ट्राफिक प्रहरी कार्यालय दोलखाले पछिल्लो दश महिनाको अवधिमा दुई करोड भन्दा बढी राजस्व संकलन गरेको छ।

कार्यालयले चालु आर्थिक वर्ष २०८०-०८१ को साउन देखि वैशाख मसान्तसम्मको १० महिनाको अवधिमा विभिन्न सवारी कारबाहीबाट दुई करोड ३३ लाख ८ हजार नौसय राजस्व संकलन गरेको ट्राफिक प्रहरी कार्यालय दोलखाका प्रमुख ठाकुरप्रसाद भट्टराईले जानकारी दिए। उनका अनुसार यो अवधिमा तिन हजार १५ वटा सवारीलाई कारबाही गरिएको थियो। जस अन्तर्गत ४ सय ७७ वटा ट्रक कारबाहीबाट ४ लाख १० हजार राजस्व संकलन भएको थियो।त्यसैगरी ५ सय ७५ वटा बस कारबाहीबाट  ४ लाख ४८ हजार ५ सय, १ हजार १३ वटा जिपकार कारबाहीबाट ४ लाख ६७ हजार, १ सय ९ वटा ट्याक्टर कारबाहीबाट ८८ हजार पाँच सय राजस्व संकलन भएको प्रमुख भट्टराईले बताए।

त्यसैगरी ७ सय मोटरसाइकल कारबाहीबाट ८ लाख ६२ हजार ९ सय र १ सय २३ वटा अन्य सवारीसाधानबाट १ लाख ४ हजार राजस्व संकलन गरिएको बताए।त्यसैगरी  कार्यालयले ई-चलान कारबाहीबाट पनि ६ लाख ९३ हजार पाँचसय राजस्व संकलन भएको जनाएको छ। कार्यालयको वार्षिक तथ्यांकअनुसार यो अवधिमा ३२ वटा सवारी दुर्घटना हुँदा ७ जनाको मृत्यु भएको छ भने, ७३ जना घाइते भएको पनि उल्लेख गरेको छ। मृत्यु हुनेहरूमा पुरुष ३ जना, महिला ३ जना र बालक १ जना रहेको छ भने घाईते हुनेहरूमा ४४ जना पुरुष, १७ जना महिला, ९ जना बालिका र ३ जना बालक रहेको छ।

त्यसैगरी कार्यालयले दुर्घटना न्यूनीकरणको लागि जिल्लाभरमा ६ सय ८ पटक विभिन्न राजमार्ग, विद्यालय, स्वास्थ्य संस्था तथा बजार क्षेत्रमा जनचेतना कार्यक्रम सञ्चालन गरेको समेत ट्राफिक प्रहरी कार्यालय दोलखाले जनाएको छ।