काठमाडौँ । कोरोना भाइरस (कोभिड–१९)को स्वाब परीक्षणका लागि लाइनमा बस्दै गर्दा बाँकेमा एक जनाको मृत्यु भएको छ । जिल्लाको कोहलपुर नगरपालिकाका ५९ वर्षीय पुरुषले स्वाब दिन लाइनमा बस्दाबस्दै मृत्यु भएको हो ।

नेपालगञ्ज मेडिकल कलेज शिक्षण अस्पताल कोहलपुरमा कोरोना परीक्षणका लागि स्वाब दिन पालो कुरेर बसेका उनको शुक्रबार दिउँसो मृत्यु भएको हो । अस्पताल ल्याउन ढिला भएकाले अक्सिजन लेभल कम भएर उनको मृत्यु भएको हुन सक्ने चिकित्सकहरुले बताएका छन् ।

स्वाब दिन कुर्दाकुर्दै बिरामीको मृत्यु भएपछि आफन्तले रिक्सामा राखेर शव घर लगेको तस्बिर कोहलपुर मेडिकल कलेज नेपालगन्जका डा. देवेन्द्र आचार्यले खिचेका छन् ।