काठमाडौं । विश्वप्रसिद्ध फर्मुला वन टोली एस्टन मार्टिन अराम्को र चिनियाँ स्मार्टफोन निर्माता रियलमीबीच दीर्घकालीन लाइसेन्स सहकार्यको घोषणा गरिएको छ । उक्त सहकार्य अन्तर्गत पहिलो पटक दुई ब्रान्डको संयुक्त पहिचान बोकेको रियलमी जीटी ७ – ड्रीम एडिसन स्मार्टफोन २७ मेमा सार्वजनिक गरिएको हो ।

रियलमीको फ्ल्यागशिप सिरिजअन्तर्गत ल्याइएको जीटी ७ ड्रीम एडिसनमा एस्टन मार्टिन अराम्कोको प्रतिष्ठित पङ्खायुक्त लोगो समेत समावेश गरिएको छ, जसले यो स्मार्टफोनलाई अन्य प्रतिस्पर्धी मोडेलहरूबाट पृथक बनाएको छ ।

यस सहकार्यलाई टेक्नोलोजी र मोटरस्पोर्ट्सबीचको ‘फ्युजन’का रूपमा हेरिएको छ । जीटी ७ मा नवीनतम प्रोसेसर, उच्च रिजोल्युसनको डिस्प्ले, शक्तिशाली ब्याट्री, फास्ट चार्जिङ टेक्नोलोजी र उन्नत क्यामेरा सिस्टम जस्ता अत्याधुनिक फिचरहरू समावेश छन् ।

रियलमीका सीईओ स्काई ली ले एस्टन मार्टिनसँगको सहकार्यलाई “वैश्विक स्तरमा ब्रान्ड विस्तारको ऐतिहासिक अवसर” का रूपमा व्याख्या गरेका छन् । उनका अनुसार, “हामी फ्ल्यागशिप लेबल केवल उत्कृष्ट उत्पादनहरूलाई मात्र दिन्छौं, र अब एस्टन मार्टिनसँगको सहकार्यले अझ एडभान्स्ड टेक्नोलोजी र डिजाइनमार्फत विश्वभरका प्रयोगकर्तालाई उत्कृष्ट अनुभव दिन सक्षम हुनेछौं ।”

त्यसैगरी, एस्टन मार्टिन अराम्को फर्मुला वन टिमका हेड अफ लाइसेन्सिङ्ग र मर्चेन्डाइज म्याट च्यापम्यान ले जीटी ७ ड्रीम एडिसनलाई “नवीनतम डिजाइन र उच्च कार्यसम्पादनको संयोजन” भनेर प्रशंसा गर्दै आगामी मोडेलहरूमा निरन्तर सहकार्यको संकेत दिएका छन् ।

रियलमीले हालसम्म विश्वभर २० करोडभन्दा बढी प्रयोगकर्ता बनाइसकेको छ । ‘Make it Real’ स्लोगन बोकेको कम्पनीले युवापुस्तालाई लक्षित गर्दै सुलभ मूल्यमा नवप्रवर्तनयुक्त प्रविधि उपलब्ध गराउँदै आएको छ ।

सहकार्य अन्तर्गत दुवै ब्रान्डले हरेक वर्ष दुई संयुक्त स्मार्टफोन मोडेल सार्वजनिक गर्ने योजना पनि घोषणा गरेका छन्, जसले मोबाइल बजारमा नयाँ प्रतिस्पर्धा र क्रिएटिभ सोच प्रस्तुत गर्ने अपेक्षा गरिएको छ ।