काठमाडौं । प्रधानमन्त्री केपी शर्मा ओलीले तेश्रो पटक सिंहदरबारको बागडोर सम्हालेका छन् । संसद्मा विश्वासको मत प्राप्त नगरी पदमुक्त भएको तेस्रो दिनमै ओली संसद्को सबैभन्दा ठूलो दलको हैसियतमा प्रधानमन्त्री नियुक्त भएका थिए ।

उनले आजै राष्ट्रपति विद्यादेवी भण्डारी समक्ष पद तथा गोपनियताको शपथ ग्रहण गरेका छन् ।

विपक्षी गठबन्धन नेपाली कांग्रेस, नेकपा (माओवादी केन्द्र) र जनता समाजवादी पार्टी (जसपा)को एउटा घटक (उपेन्द्र-बाबुराम)ले संसद्मा सरकार बनाउन आवश्यक १३६ मत पुर्याउन नसकेपछि संविधानको धारा ७६ (३) अनुसार संसद्को ठूलो दलको हैसियतमा नेकपा (एमाले) का अध्यक्ष ओली बिहीबार बेलुकी नै प्रधानमन्त्रीमा नियुक्त भएका थिए । योसहित ओली तेस्रोपटक प्रधानमन्त्री नियुक्त भएका हुन् ।

ओलीले शपथ लिएसँगै आजै मन्त्रिपरिषद्समेत विस्तार गरेका छन् । उनले आफ्नो मन्त्रिमण्डलमा रहेका अधिकांश पूरानै नेताहरुलाई मन्त्री नियुक्त गरेका छन् । आफूलाई तेस्रोपटक प्रधानमन्त्री बन्न सघाएका जसपाको एक घटक (महन्थ राजेन्द्र)लाई पनि ओलीले आफ्नो क्याविनेटमा ल्याएर मन्त्री बनाउन चाहेका थिए ।

तर, जसपाको उक्त घटकले केही परिस्थति निर्माण गरेर मात्र सरकारमा आउने आश्वासन दिएपछि अहिले ओलीले आफ्नै पार्टी एमालेका तर्फबाट मात्र नेताहरुलाई समेटेर मन्त्रिमण्डल गठन गरेका हुन् । ओलीले आफ्ना पूरानै मन्त्रिमण्डलका सबैलाई समेटेर अहिले मन्त्रिमण्डल बनाएका हुन् ।

जसअनुसार ईश्वर पोखरेलले उपप्रधानसहित प्रधानमन्त्री तथा मन्त्रिपरिषद्को कार्यालय, रामबहादुर थापा (बादल) गृह, विष्णु पौडेलले अर्थ मन्त्रीको जिम्मेवारी पाएका छन् । अन्य मन्त्रीहरु पनि पूरानै छन् ।

बिहान प्रधानमन्त्री निवास बालुवाटारमा पूर्वमाओवादी धारका ५ र एमाले धारका ५ जनालाई मात्र समेटेर पहिलो चरणमा १० जना मात्र मन्त्री बनाउने समझदारी बनेको थियो ।

तर माधव नेपाल पक्षले मन्त्रीको नाम टुंगो नलगाएपछि र जसपाका पनि नेताहरु केही प्राविधिक विषय मिलाएर सरकारमा आउने बताएपछि ओलीले अहिले पूराना सबै मन्त्रीलाई यथास्थानको मन्त्री मन्त्रिपरिषद्को गठन गरेका हुन् ।

उनले नेपाल पक्षले टुंगो लगाएपछि र जसपाको पनि प्राविधिक तयारी पूरा गरेपछि अहिलेको मन्त्रिमण्डललाई पूर्नगठन गर्ने गरी क्याविनेटमा पूरानैलाई दोहोर्याएका हुन् ।

क्याविनेटमा प्रधानमन्त्री ओलीका सारथी