काठमाडौं । अमेरिकाका पूर्व राष्ट्रपति बाराक ओबामाले नेटफ्लिक्सको सहकार्यमा सगरमाथा आरोही तेन्जिङ नोर्गे शेर्पाको जीवनीमा फिल्म बनाउँदैछन् । नेपालस्थित विश्वको सर्वोच्च शिखर सगरमाथा आरोहण गर्ने विश्वकै पहिलो व्यक्ति तेन्जिङ ऐतिहासिक रहेकाले जीवनी फिल्म बनाउन लागको नेटफ्लिक्सले जनाएको छ ।

सुरुवाती चरणमा तेन्जिङको खोजी भइरहेको र केही महिनासम्म अडिसन चल्ने छ । आवेदन दिनेको शारीरिक ढाँचा खेलाडी शैलीको हुनुपर्ने उल्लेख गरिएको छ ।

२०२२ मा फिल्मको छायांकन नेपाल र न्यूजिल्यान्डमा हुने छ । जेनिफर पिडमद्धारा फिल्मको निर्देशन हुनेछ । तेन्जिङले सगरमाथा चढ्न गरेको संघर्ष, मेहनत र सफलतालाई देखाउने फिल्मको मुख्य उद्देश्य छ ।

तेन्जिङ नोर्गे शेर्पा र न्युजिल्यान्डका आरोही एडमन्ड हिलारीले सन् १९५३ मे २९ मा पहिलो पटक एकसाथ सर्वोच्च शिखर सगरमाथाको सफल आरोहण गरेका थिए । सोलुखुम्बुको थामे भन्ने ठाउँमा १९१४ मे २९ मा जन्मिएका तेन्जिङले ३९ वर्षको उमेरमा सगरमाथाको आरोहण गरेका थिए । उनको मृत्यु भने ९ मे १९८६ मा ७२ वर्षको उमेरमा भारतको दार्जिलिङमा भएको थियो । सन् २००३ मा इद डग्लासले लेखेको ‘तेन्जिङ : हिरो अफ एभरेस्ट’ पुस्तकमा आधारित भएर निर्माण हुन लागेको हो ।

कम्पनीको बेवसाइटमा अभिनयको अनुभव नहुनेलाई पनि कास्टिङको मौका दिइने जनाइएको छ । २५ देखि ४० वर्ष उमेर समुहका तिब्बत, शेर्पा र नेपालीले अडिसनका लागि आवेदन दिन सक्नेछन् । तेन्जिङको जीवनीको मुख्य पात्रको विश्वभरबाट खोजी सुरु भएको छ ।

तेन्जिङ नोर्गेको भूमिकाका लागि अडिसनका लागि यसमा निवेदन दिनुस् ।