न्युजिल्यान्डका प्रधानमन्त्री क्रिस्टोफर लक्सनले बुधबार आगामी नोभेम्बर ७ तारिखमा आम निर्वाचन हुने घोषणा गरेका छन् । निर्वाचनको मिति सार्वजनिक गर्दै उनले अर्थतन्त्र सुधार र अपराध नियन्त्रणमा आफ्नो सरकारको उपलब्धिलाई मुख्य आधारका रूपमा प्रस्तुत गरेका छन् ।

प्रधानमन्त्री लक्सनले पत्रकारहरूसँग कुरा गर्दै निर्वाचनको मिति छनोटमा खेलकुदप्रेमी न्युजिल्यान्डको क्यालेन्डरले पनि केही भूमिका खेलेको बताए । अल ब्ल्याक्सले अस्ट्रेलियाविरुद्ध घरेलु मैदानमा खेलेको खेल सकिएको करिब एक महिनापछि निर्वाचन तय गरिएको उनको भनाइ थियो ।

गत महिना सार्वजनिक भएको करदाताहरू युनियनरक्युरिया सर्वेक्षणअनुसार विपक्षी लेबर पार्टीले ३१।६ प्रतिशत मत समर्थनसहित लक्सन नेतृत्वको कन्जर्भेटिभ नेसनल पार्टीलाई ३०।० प्रतिशतमा हल्का अग्रता लिएको देखिएको छ । यद्यपि, सोही सर्वेक्षणले गठबन्धन साझेदार दलहरूको समर्थनका कारण लक्सन नेतृत्वको सरकार अझै सत्तामा रहने सम्भावना रहेको सङ्केत गरेको छ ।

प्रधानमन्त्री लक्सनले आफ्नो सरकारले ‘आधारभूत कुराहरू ठिक पार्ने योजना’ पूरा गर्ने प्रतिबद्धता दोहोर्‍याए । उनले पदभार सम्हाल्दा देश गलत दिशातर्फ गइरहेको र विगत दुई वर्षमा अवस्था सुधार्न कडा मेहनत गर्नुपरेको उल्लेख गरे । उनका अनुसार व्यापार र उपभोक्ताको विश्वास बढ्दो क्रममा छ, निर्माण तथा पूर्वाधार क्षेत्रमा गति आएको छ र निर्यातले उल्लेखनीय रूपमा राम्रो प्रदर्शन गरिरहेको छ ।

प्रधानमन्त्रीले अघिल्लो सरकारको कार्यकालमा मुद्रास्फीति करिब ७ प्रतिशतबाट घटेर ३ प्रतिशतभन्दा कममा झरेको दाबी गरे । साथै, भारतसँग भएको स्वतन्त्र व्यापार सम्झौतालाई महत्त्वपूर्ण उपलब्धिका रूपमा उल्लेख गर्दै त्यसलाई कार्यान्वयन गर्ने कानून यसै वर्ष पारित हुने अपेक्षा व्यक्त गरे ।

अपराध नियन्त्रणका सवालमा पनि प्रधानमन्त्री लक्सनले आफ्नो सरकारको कामको प्रशंसा गरे । उनका अनुसार प्रहरी सडकमा बढी देखिन थालेका छन्, अपराधका सिकार हुनेको सङ्ख्या ३८ हजारले घटेको छ, युवा अपराध १६ प्रतिशतले कम भएको छ र सशस्त्र छापाको घटना ८५ प्रतिशतले घटेको छ ।

यसबीच विपक्षी लेबर पार्टीका नेता क्रिस हिप्किन्सले भने प्रधानमन्त्री लक्सनले अपेक्षाकृत ढिलो निर्वाचनको मिति रोज्नुको कारण आफ्नो पद जोगाउने निराश प्रयास भएको आरोप लगाए । सन् २०२३ मा जासिन्डा अर्डर्नको राजीनामापछि छोटो समय प्रधानमन्त्री रहेका हिप्किन्सले न्युजिल्यान्डमा सामान्यतया अक्टोबरमा निर्वाचन हुने गरेको स्मरण गराउँदै यसपटक नोभेम्बरमा सारिनु अर्थपूर्ण भएको टिप्पणी गरे ।

हिप्किन्सले आफ्नो पार्टीले सकारात्मक एजेन्डासहित चुनावी अभियान चलाउने बताय । उनले नेसनल पार्टीले अझ बढी दोषारोपण, बहाना र कटौतीको राजनीति गरिरहेको आरोप लगाउँदै न्युजिल्यान्ड त्योभन्दा राम्रो विकल्पको हकदार रहेको धारणा राखे ।

न्युजिल्यान्डमा पछिल्लो आम निर्वाचन सन् २०२३ को अक्टोबर १४ मा सम्पन्न भएको थियो ।