काठमाडौँ। चाँगुनारायण नगरपालिका वडा–९ को सहयोगमा गोपाल गौरी दिगो विकास प्रतिष्ठानले आयोजना गरेको दुई महिने “ढाका बुनाई” तालिममा सहभागीहरुलाई प्रमाणपत्र प्रदान गरिएको छ ।

प्रतिष्ठानद्वारा आयोजित कार्यक्रममा चाँगुनारायण नपाका महिला तथा बालबालिका शाखा प्रमुख निलाकुमार घिमिरे, वडा–९ का अध्यक्ष गणेश त्यात्तलगायतले तालिममा सहभागीहरु १० जनालाई प्रमाणपत्र प्रदान गरका हुन् ।

सो अवसरमा चाँगुनारायण न.पा.का महिला तथा बालबालिका शाखा प्रमुख निला कुमारी घिमिरे तालिम लिएका वडा–९ का स्थानीय प्रशिक्षार्थीहरुलाई आफूले पाएको तालिमको सदुपयोग गरी आय आर्जनमा लाग्न आग्रह गरिन् ।

गोपाल गौरी दिगो विकास प्रतिष्ठानका अध्यक्ष इन्दिरा गौतमले भनिन्,“स्थानीय महिलालाई हामी सिप दिन्छौ, दिदीबहिनीहरुले आर्थिक रुपमा आत्मनिर्भर हुन आफ्नो सिपलाई व्यवसाय, रोजगारीसँग जोड्नुहोस्, आवश्यक सहयोग गर्न प्रतिष्ठान सधैं तयार छ ।”

उनले यस तालिममा सहभागीहरुलाई सारी,सानो/ठूलो पछौरा,थानको कपडा बुन्न सिकाईएको जानकारी दिइन् ।

वडा सदस्य कमला गिरीले प्रतिष्ठानले महिलालाई ढाका बुन्ने सिप दिनुभएकोमा धन्यवाद ज्ञापन गर्दै महिला दिदीवहिनीले आफैंले बुनेका कपडा लगाउन पाउँदा गौरव महसुस हुने बताइन्
।
प्रतिष्ठानका महासचिव गीता न्यौपानेले ६० दिनसम्म मेहनतका साथ सिकेको सिपलाई व्यवहारमा उतारेर आर्थिक रुपमा आत्मनिर्भर हुनुपर्नेमा जोड दिइन् ।

तालिममा सहभागी कोपिला खड्काले दुई महिने तालिममा सिकेको सिपको सदुपयोग गर्ने वातावरण मिलाईदिन आग्रह गरिन् ।

त्यसैगरी रन्जना हेगजुले प्रशिक्षकहरुले झर्को नमानी सिकाएको स्मरण गर्दै ढाका बुन्ने मेसिन पाए अब काम गर्न सक्ने आत्मविश्वास पलाएको अनुभव सुनाइन् ।

यस तालिममा प्रशिक्षकहरु थममाया पुलामी मगर र बविता देवान राईले १० जना स्थानीय महिलालाई ढाका बुनाई प्रशिक्षण दिएकी थिइन् ।

सो अवसरमा सहभागीलाई प्रतिष्ठानको तर्फबाट ढाका बुन्ने एउटा मेसिन पनि प्रदान गरिएको थियो ।