काठमाडौं । नेपाल लाइफ इन्स्योरेन्सले स्थापनाको २५औँ वार्षिकोत्सवको अवसरमा निःशुल्क स्वास्थ्य शिविर एवम् देशैभर रक्तदान कार्यक्रम सम्पन्न गरेको छ ।

यही वैशाख २१ र २२ गते कम्पनीले आफ्नो प्रधान कार्यालयमा निःशुल्क स्वास्थ्य शिविर सञ्चालन गरेको हो । स्वास्थ्य परीक्षण सेवा आरबी डाइग्नोष्टिकमार्फत प्रदान गरिएको बताइएको छ । शिविरमा ईसीजी, थाइराइड, सुगर, प्रेसर, एसजीपीटी, कोलस्ट्रोल, युरिक एसिड लगायतका निःशुल्क चेकजाँच तथा विज्ञ डाक्टरहरूबाट निःशुल्क परामर्श सुविधा प्रदान गरिएको थियो । दुईदिने शिविरबाट कुल ६०१ जनाले प्रत्यक्ष लाभ लिएको कम्पनी जनाएको छ ।

यससँगै कम्पनीले देशभरका सातवटै प्रदेशका १३ स्थानमा बृहत् रक्तदान कार्यक्रम समेत सम्पन्न गरेको छ । कार्यक्रममार्फत कोसी प्रदेशको इटहरीमा ३०, मधेसको वीरगञ्जमा २५, जनकपुरमा २५, वाग्मती प्रदेशको काठमाडौंमा ७८, नारायणगढमा ८१, नुवाकोटमा ३९, हेटौँडामा २६, बनेपामा ३२, गण्डकी प्रदेशको पोखरामा ५५, लुम्बिनीको बुटवलमा ३३, भैरहवामा ३४, कर्णालीको सुर्खेतमा २५ र सुदूरपश्चिमको धनगढीमा ३३ गरी कुल ५०५ पिन्ट रगत संकलन गरिएको छ ।

वार्षिकोत्सवको विशेष अवसरमा कम्पनीका प्रमुख कार्यकारी अधिकृत प्रवीणरमण पराजुलीले मार्गनिर्देशन प्रदान गर्नेप्रति आभार व्यक्त गरे । साथै, आगामी दिनमा पनि कम्पनीले सबैको माया, विश्वास र सहकार्य पाउने अपेक्षा गरेको छ ।