काठमाडौं । बजेट आएको दोस्रो दिन ठूलो अंकले उकालो लागेको नेप्सेमा दुई दिनदेखि ओरालो लागेको छ ।

आइतबार नयाँ रेकर्ड बनाएको नेप्से सोमबार र मंगलबार गिरावट आएको हो । स्टक एक्सचेञ्जमा आबद्ध कम्पनीको शेयर कारोबार मापक बजार परिसुचक ११ दशमलब ६८ अंकले घटेर २ हजार ७ सय ७१ दशमलब ७१ विन्दूमा आइपुगेको छ ।

मंगलबार कारोबार रकम पनि घटेको छ । विगत केही दिनदेखि कारोबार रकमले रेकर्ड बनाइरहेको थियो ।

यद्यपी मंगलबार कूल २ सय १६ कम्पनीको ९८ हजार ६ सय ७ कारोबारबाट ८ अर्ब ५९ करोड ८१ लख ६० हजार १ सय १७ रुपैयाँ बराबरको १ करोड ९७ लाख ८३ हजार ३ सय ५४ कित्ता शेयर किनबेच भएको स्टक एक्सचेञ्जले जनाएको छ ।

मंगलबार सबैभन्दा धेरै होटल, ट्रेडिङ निर्जीवन बिमा र जलविद्युत् कम्पनीको सेयर मूल्य घटेको छ ।

बजारमा साना लगानीकर्ता घट्न सक्ने भन्दै बिक्री गर्न उत्रिएपछि त्यसको असर बजारमा परेको शेयर लगानीकर्ता नवराज अधिकारीले बताए । वर्षौंदेखि केही जलविद्युत् आयोजना घाटामा रहेका कारण सूचक घटेको उनले बताए ।

जलविद्युत् कम्पनीको वास्तविक अवस्था सार्वजनिक भएपछि साना लगानीकर्ता मध्ये कतिपयले नाफा बुक गरेका छन् भने कतिपयले घाटा खाएरै भए पनि सेयर बेच्दा बजार सूचक घट्नमा मद्दत पुगेको उनले बताए ।

यद्यपि, यसलाई ठूला र राम्रो कम्पनीको सेयर किन्ने लगानीकर्ताले सही रुपमा लिएका छन् । बजार एकोहोरो बढ्दा पनि समस्या हुन्छ । त्यही भएर कहिले घट्ने र कहिले बढ्ने गरेर अघि बढ्नुपर्छ । साना लगानीकर्ताले पनि राम्रा कम्पनी हेरेर मात्रै लगानी गर्नुपर्ने हुन्छ ।